ВЕСТ НА ДЕНОТ
Обвинителството за гонење на организиран криминал и корупција ја прифати понудената гаранција од 10 милиони евра за бранење од слобода на поранешниот директор на Управата за безбедност и контраразузнавање Сашо Мијалков кој е во притвор.
„Обвинителството ценејќи ги околностите и имајќи ги предвид наводите во предлогот и дополненијата за укинување на мерката притвор и нејзина замена со мерка гаранција, ценеше дека висината на понудената гаранција во доставените предлози во вкупен износ од 10.871.170,00 евра е прифатлива за обвинителството за обезбедување на присуство на обвинетиот до правосилноста на пресудата“ се вели во одговорот за Радио Слободна Европа од Обвинителството за гонење на организиран криминал и корупција.
ИЗЈАВА НА ДЕНОТ
„За таа тема едногласно треба да се одлучи. Значи 26 земји членки се држат како заложници од некои мали национални интереси на една земја која прави штета на целата Европска Унија и го уништува нејзиниот кредибилитет на Западен Балкан. Не сакам да зборувам за Западен Балкан како наше соседство затоа што Западен Балкан е всушност дел од Европа и тие се поврзани, и ние сме сите поврзани со споделена и заедничка историја, и луѓето и економиите се многу повеќе испреплетени меѓусебе. Германија од таа страна ја поддржува политиката за проширување, денес фокусот е на Западен Балкан за да се обезбеди сигурност и стабилност на овој дел од Европа“, изјави германската амбасадорка во Северна Македонија, Анке Холштајн, додавајќи дека една силна ЕУ има потреба од силен и стабилен Западен Балкан и тоа отсекогаш било една од клучните цели на ЕУ и на самата политика на проширување.
ЦИВИЛНИ АКТИВНОСТИ
Панел на ЦИВИЛ: „Мултикултурализмот и европските вредности во медиумите“
ЦИВИЛ организира панел дискусија на тема: „Мултикултурализмот и европските вредности во медиумите“ на 20 мај (во четврток), во хотел Сити Парк (спроти Фонтана во Градски Парк), со почеток во 13 часот.
Учесници на панелот ќе бидат Елида Зулбеари, уредничка на Порталб, Драган Антоновски, директор и главен и одговорен уредник на МИА и Фиљана Кока, заменик претседател на ЗНМ и новинарка во МРТ. Настанот ќе го модерира Дехран Муратов, ЦИВИЛ.
Со кои предизвици се соочуваат медиумите? Која е улогата на медиумите за промовирање на европските вредности и мултикултурализмот во нашата држава?, се дел од прашањата кои ќе бидат поставени на панел дискусијата.
Панел на ЦИВИЛ: Општествена одговорност во промовирањето на различностите и европските вредности
ЦИВИЛ ќе организира панел дискусија за општествената одговорност на интелектуалците и уметниците во промовирањето на различностите и европските вредности, на 21 мај (петок), со почеток во 13 часот, во хотел Сити Парк, во Скопје.
Панел дискусијата е дел од Иницијативата „Направи разлика: Почитувај ги различностите“ што се спроведува со поддршка од Министерството за надворешни и европски прашања на Големото војводство Луксембург.
На панелот се поканети учесниците во Иницијативата кои преку видео пораки ја промовираа мултикултурата и европските вредности, за изградба на општество во кое различностите се почитуваат и доживуваат како предност, богатство и квалитет.
ФЛЕШ ВЕСТИ
ПОЛИТИКА Премиерот Зоран Заев по средбата со шефот на Европскиот Совет, Шарл Мишел, излезе задоволен нарекувајќи ја „прекрасна“. Мишел како претседавач на телото каде заседаваат шефовите на држави и влади има привилегиран пристап до сите земји членки и премиерот Заев изрази увереност дека Мишел има разбирање и волја за вистински исчекор во однос на Северна Македонија на претстојните јунски совети на ЕУ кога конечно се очекува свикувањето на првата Меѓувладина конференција, доколку се надмине блокадата на Бугарија.
Дивоградбите во заштитените подрачја да се изземат од законот за легализација, е најновиот предлог на Владата, донесен на последната седница, што се одржа вчера. Владата не се откажува целосно од контроверзниот Предлог- закон што во скратена постапка беше изгласан во Собранието, но претседателот Стево Пендаровски не го потпиша Указот за прогласување.
Владата ја задолжи Царинската управа да спроведе внатрешна контрола за конкретниот случај, да се испита колкави количини од наведените нафтени деривати се увезени од 2018 до 2020 година и под која царинска шифра е извршен увозот, како и тоа дали податоците во декларациите соодветствуваат со дериватот што е увезен.
ЕКОНОМИЈА Министерот за финансии Фатмир Бесими и амбасадорката на Швајцарија во земјава Сибил Зутер Техада го потпишаа Протоколот за усогласување на Спогодбата меѓу Република Северна Македонија и Швајцарија за одбегнување на двојното оданочување, согласно новата даночна конвенција на Организацијата за економска соработка и развој (ОЕЦД) и БЕПС стандардите.
ОБРАЗОВАНИЕ Државниот испитен центар ги привршува подготовките за државната матура, на 5 јуни се полага првиот екстерен испит
Соработката што се гради врз основа на образование продуцира долготрајно пријателство, заедничко разбирање и солидарност. Двете пријателски земји, Република Северна Македонија и Република Турција, во континуитет ги унапредуваат билатералните односи и меѓусебно се поддржуваат, а токму во сферата на образованието бележат одлична соработка, беше констатирано на денешната средба во Анкара меѓу министерката за образование и наука Мила Царовска и претседателот на Големото народно собрание на Турција, Мустафа Шентоп.
Комисијата за политички системи и односи меѓу заедниците и на Законодавно-правната комисија повикувајќи се на автентично толкување на законот за референдум и други облици за непосредно изјаснување на граѓаните утврдија дека предлогот за покренување граѓанска иницијатива за распишување на референдум за нацрт Законот за дигитализирање на учебниците во основните и средните училиштата, е неуреден и со тоа се одбива барањето на Инцијативата „Учебници и настава мора да има“.
КОВИД-19 На вакциналните пунктови во земјава заклучно со вчера вакцинирани се вкупно 186.146 граѓани. Во државата вкупно се аплицирани 219.977 дози вакцини, а ревакцинирани се 33.831 граѓанин. Со последните бројки 43% од населението над 70 години имаат примено барем една доза вакцина и 33% од населението над 65 години е вакцинирано со барем една доза вакцина.
„Маските треба да продолжат да се носат и понатаму и уште е рано да се тргнат како мерка. Угостителските објекти да продолжат да работат само надвор, а по подолго време треба да се дозволат свадби со протоколи во однос на пополнетост на капацитети во надворешни услови, а не и внатре. Евентуално може да се излезе во пресрет на барање за зголемување на бројот на посетители на една маса“, изјави денеска министерот за здравство Венко Филипче пред Арена А1 СЦ „Борис Трајковски“.
ЛАЖНИ ВЕСТИ Министерството за внатрешни работи најостро ги демантира објавите на некои портали за наводен упад на МВР во телевизија Алфа.
СЛОБОДНА ЗОНА
„Мрско ми е секое навивање, мрски ми се и долгогодишните светски блебетања за решавање на еден вештачки спор што држи два многу блиски народи, различни само по религија (и не само нив туку цел регион и пошироко) во повеќедецениско страдање и „рат рејс“ (трка на експериментален глушец со себе во тркало во кафез).
Светот, моќните земји, самите Израелци и Палестинци, ако сакаат, можат да најдат решение за тој спор. Се решаваат и се решија многу такви светски спорови. Неколку пати и решението било многу блиско. Но за тоа да се случи, треба да има воља, пред се политичка, но и човечка, да се сопрат децениските страдања“, вели Петрит Сарачини во „До построените зад Палестина и Израел“
Б. Јордановска
