На денешната тематската седница на Владата по повод 20 годишнината од Охридскиот рамковен договор, се обрати и првиот заменик-претседател на Владата и министер за политички систем и односи меѓу заедниците, Артан Груби, кој го истакна значењето на одбележувањето на јубилејната годишнина на Рамковниот договор, како значаен документ, којшто донесе мир, го промени Уставот и општеството и ни ги отвори евроатлантските перспективи.
„Мотото на прославата е „По Охрид“, а програмата започнува вечерва со изложба во Мала Станица во Скопје со дела од уметници од сите заедници во земјава, ќе следува театарска претстава. Предвидена е и седница на Собранието, конференции на три универзитети, концерти, вклучување на немнозинските заедници и невладините организации, настани во Струга, Кичево и Чаир како општини кои што се директен резултат од имплементацијата на договорот… Програмата ќе финишира на 13 август со конференција во соработка со Универзитетот Колумбиа од Њујорк, со учеството на државниот врв, но и на пријателите од меѓународната заедница, од НАТО, ЕУ, ОБСЕ и САД и гости кои помогнаа со надминувањето на кризата и Рамковниот договор, како и со екслузивен концерт на Рам Лахај со нашата филхармонија и прием. За најмладите планираме концерт вечерта на плоштад“, рече Груби на тематската седница на Владата.
-Истовремено, во соработка со консултантите ангажирани од ЕУ, кои што работат на реорганизацијата на државната управа, срочивме модерен предлог закон за работата на Министерството кое што и согласно коалицискиот договор, го надградуваме во мало, ефективно министерство кое што ќе се грижи за правата на сите заедници, не само етнички, туку на сите можни припадности. Текстот наскоро ќе го претставиме за ваши предлози. Заедно ги систематизиравме сите вработени по К5 програмата по повеќе од 10 години напори и обезбедивме дом за сите вработени и сите заедници и поврзани институции на едно место и сето тоа во првите шест месеци од оваа Влада, информираше Груби.
Инаку, вицепремиерот Груби ексклузивно за ЦИВИЛ ги најави настаните по повод 20 годишнината од ОРД, веќе во мај, на јавниот настан на ЦИВИЛ на тема „Европските вредности – (не)возможна мисија: Еднаквоста, недискриминацијата и мултикултурализмот низ призмата на политиките и практиките на национално ниво“
„Ексклузивно денеска за настанот, ние се залагаме за многу динамично и агресивно одбележување на 20 годишнината од Охридскиот и 30 годишнината од независноста и ќе ги поврземе двете со агресивни културни настани. Под агресивни мислам на динамични, последователни, за да го исполниме вакумот на било кои негативни влијанија, да го исполниме тој вакум со позитивни настани. Значи агресивни културни настани, концерти, театарска претстава,“ истакна првиот вицепремиер Артан Груби на прашањето дали на одбележувањето на јубилеите од Охридскиот Рамковен Договор и независноста на Македонската држава се забележува позитивен прием на јавноста и медиумите, или веќе има кампањи кои би можеле да го насочат вниманието на јавноста во друга насока.