Уште еднаш САД треба да реагираат на Балканот, каде ЕУ не може да постигне поместување на позициите, коментира за „Гласот на Америка“ на македонски јазик истакнатиот аналитичар Едвард Џозеф од Школата за напредни и меѓународни студии при Универзитетот Џонс Хопкинс во Вашингтон.
Во интервјуто, Џозеф, кој е добар познавач на политиката и историјата на Балканот, ја коментира ситуацијата меѓу Северна Македонија и Бугарија, за која вели дека е огромен сериозен предизвик за ЕУ и клучен предизвик за визијата на ЕУ и САД за интеграцијата на Балканот. „Неуспехот да се реши брзо, на рамноправна основа, ќе го дестабилизира регионот, и ќе ја отвори вратата за влез на Русија и Кина“, коментира Џозеф.
Тој потсети дека како што многупати спомнувал за релациите меѓу Србија и Косово, се работи за манифестирање на сила од посилниот кон послабиот.
„Се работи за манифестирање на сила. Софија има моќ, како членка во ЕУ, и го блокира отпочнувањето на преговорите на Северна Македонија, која ги заслужи. Северна Македонија стори тоа што неа се бараше, дури и повеќе од некои други земји. Бугарија од позиција на членка поставува нерационални барања за македонскиот идентитет, коментира овој аналитичар од Вашингтон“, вели Џозеф.
За него, клучно е откочување на европската перспектива, која ја засега не само Македонија, туку и другите земји во регионот.
„Најважно е да се отстрани пат-позицијата во која се наоѓа Балканот, која создава простор за понатамошно кинеско и руско влијание, а тоа ги деморализира граѓаните на Македонија, но и на Албанија. Овие две држави се држат во заложништво поради неразумни барања од Бугарија за коригирање на историјата, од гледиште на Софија“, додава Џозеф.
Во случајот со Македонија и бугарското вето, Џозеф вели дека ЕУ ги прекршува и своите повелби и заложби, но и процедури.
„ЕУ има стандардизирана политика со која не може да прими билатерални прашања во пристапните преговори. А, тоа го прави. Ова е кршење и предизвик за самата Унијата и нејзините процедури. Унијата не ги држи одговорни членките за своето однесување и во случајот со Бугарија кон Северна Македонија, и Албанија како колатерална жртва, со манифестирање сила од позиција на членка во ЕУ“, констатира Џозеф во интервјуто за Гласот на Америка на македонски јазик.
извор: ВОА на македонски јазик