Постапката за собирањето потписи на избирачите за кандидирање на локалните избори започнува утре (16 август) согласно Роковникот на Државната изборна комисија, а завршува на 30 август на полноќ. Повеќе групи на граѓани најавија собирање потписи за учество со свои листи на локалните избори и тие веќе и се познати на јавноста.
Потписите се собираат пред службените лица на ДИК и пред надлежен нотар на образец утврден од Комисијата во терминот од 8 до 20:00 часот, до 30 август на полноќ.
Кога подносител на листа на кандидат за градоначалник е група избирачи, во општината до 10.000 жители потребно е да се соберат најмалку 100 потписи од запишаните избирачи во изводот од Избирачкиот список за општината.
Во општината од 10.001 до 30.000 жители се бараат најмалку 150 потписи од запишаните избирачи во изводот од Избирачкиот список за општината, додека во општина од 30.001 до 50.000 жители најмалку 250 потписи од запишаните избирачи во изводот од Избирачкиот список за општината.
За општини од 50.001 до 100.000 жители треба најмалку 350 потписи од запишаните избирачи во изводот од Избирачкиот список за општината, а во општина над 100.001 жители најмалку 450 потписи од запишаните избирачи во изводот од Избирачкиот список за општината.
Во Град Скопје за кандидирање се бараат најмалку 1.000 потписи од запишаните избирачи во изводот од Избирачкиот список на подрачјето на градот.
Листите на кандидати за членови на советот на Градот Скопје и листата на кандидат за градоначалник на градот, овластените претставници на предлагачите ги доставуваат до избирачките комисии на Градот Скопје најдоцна на 11 септември, до 24:00 часот- 35 дена пред денот на одржување на изборите.
Најдоцна на 23 септември ДИК на својата веб страна, а ОИК во сите население места ќе ги огласи утврдените листи за градоначалници и за советници.
Кампањата за локалните избори започнува на 27 септември на полноќ и трае до полноќ на 15 октомври.
Граѓаните со право на глас кои сакаат да се изјаснат на локалните избори закажани за 17 октомври, можат своите податоци да ги проверат во Избирачкиот список преку веб-страната на Државната изборна комисија (ДИК) – www.sec.mk или на https://izbirackispisok.gov.mk/.Официјално, јавниот увид на Избирачкиот список за изборите ќе започне на 21 август и ќе трае до 9 септември. Тогаш ДИК на увид ќе ја стави новата состојба на податоци на Избирачкиот список, што ќе се користи на денот на изборите.
На локалните избори годинава за првпат за проверка на идентитетот на граѓаните ќе се применат систем и терминали за вчитување на отпечатоци од прсти. Германската компанија „Дермалог“ првите 250 терминали треба да ги испорача на 25 август.
