Врз основа на епидемиолошката состојба ќе се види какви мерки ќе има во наредните месеци кога ќе има попис и локални избори, но, ако се почитуваат протоколите нема да има проблеми, оцени министерот за здравство Венко Филипче од Тетово на новинарско прашање дали ќе има промени во мерките и поради овие два процеси.
Ние минатата година дадовме препораки да нема големи митинзи и немаше и тоа што е битно е тоа што сите и политичките партии треба да знаат дека има препораки за тоа како собирите се организираат. И сега има општи препораки за организирање собири или настани на отворено или на затворено, проблем има секогаш кога протоколите не се почитуваат, истакна министерот.
Тој потенцира дека болниците во другите градови низ државата за разлика од Тетово и Гостивар не се преполни. Го поврзува тоа со повисокиот опфат на вакцинација и се надева дека така ќе остане.
Да, има случаи на заболени со Ковид после вакцинација, а претходно кои прележале и се исклучително малку. И тука знаете за оваа болест се уште медицината не дала одговори на се. Меѓутоа, тоа што се знае е дека вакцината сигурно за 20 пати го намалува ризикот од смртен исход. И сега кога гледате во болниците околу 85 проценти се невакцинирани и затоа е повикот, акцентот сега не само кај нас, туку насекаде во светот да се заштитиме со вакцинација, рече Филипче.
По најавените нови пунктови за вакцинација во Тетовско Филипче потенцира дека сега се менаџира тоа поради почетокот на школската година.
Добар дел од здравствениот кадар беа на годишни одмори па ние некаде ги прекинавме годишните одмори, некаде и доброволно се вратија тие коишто не беа заминати од земјава на работа за да се отворат дополнителни пунктови. По тој механизам се отвори и пунктот во салата „Борис Трајковски“ вчера во Скопје.
Во Тетово Филипче беше на средба со Теута Арифи каде ја соопшти одлуката на Кризниот штаб дека првите две недели ќе се почне со онлајн настава во средните училишта во полошкиот регион.
