Помина повеќе од половина година oд изборот на новиот состав на Комисијата за спречување и заштита од дискриминација во Собранието. Доволно време за да се сумираат впечатоците за првичните остварувања и предизвици за оваа клучна институција за борба против дискриминацијата, којашто сè уште претставува видлив проблем во нашето општество.
Во јавноста постојат поделени мислења за успешноста на Комисијата. Критичарите велат дека речиси и не е видлива во јавноста, дека има премалку активности, а особено се критикува за фактот дека сè уште нема веб-страница, преку која граѓаните би можеле да пристапат и поднесат претставки, или да дознаат повеќе за нејзината работа и активности. Од друга страна, Комисијата мораше да започне со работа од нула и да ги прави првите чекори во спроведување на новиот Закон, со сите предизвици што ги носи етаблирањето на едно ново тело, кое стартуваше со одобрен буџет, но без канцеларии, опрема и вработени.
Во наследство на Комисијата останаа предметите од старото тело, но и резервите на јавноста, пред сè поради лошите искуства со претходната Комисија, која беше под влијание на извршната власт и носеше одлуки кои предизвикуваа бурни реакции од стручњаците и јавноста.
Што се клучните работи што успеа да ги направи Комисијата досега? На каков тип дискриминација се жалат граѓаните, кои се најчестите дискриминирани и дискриминатори? Дали соработуваат институциите, ги прифаќаат ли укажувањата? Зошто не функционира веб-страницата и кога ќе почне да работи? Со какви проблеми се соочува Комисијата во комуникацијата и колку се медиумите заинтересирани за нејзината работа? Што треба да се промени за подобрување на состојбата со дискриминацијата во земјава?
За одговори на овие прашања, на разговор во ЦИВИЛ Прес студио ја поканивме Весна Бендевска, претседателка на Комисијата за спречување и заштита од дискриминација.
Интервјуто го водеше: Петрит Сарачини
Камера: Атанас Петровски
Монтажа: Ариан Мехмети
