подготви: НАТАША МАЛИНКА МИНОВСКА
Брзите и континуирани промени на условите за живот на нашата планета, поттикнати од човековата активност, кои резултираат со сериозна климатска и еколошка криза, сè повеќе ја наметнуваат потребата од изнаоѓање на оптимални решенија за справување со предизвиците.
Научниците предупредуваат за опасностите од непреземањето мерки за запирање, ублажување и санација на тие процеси. Економистите пак, од своја страна, посочуваат дека со одложувањето на преземање акција, се зголемуваат и трошоците поврзани со неа.
Енергетската ефикасност, обновливите извори на енергија, градежништвото, земјоделството, третманот на отпадот и зачувувањето на ресурсите, се само дел од областите што се фаворизираат како решенија за надминување на еколошките и климатските кризи.
Во последните години, како одраз на напорите за зазеленување на економиите, се прават обиди за креирање на што поголем број на зелени работни места. Нивниот концепт е реалност и иднина.
Зелени работни места се сите оние, чиј процес на работа е насочен кон намалување на штетното влијание на човекот врз животната средина, како и кон контролата на климатските промени. За зелено се смета секое работно место кое гарантира дека процесите кои се во доменот на неговите активности, нема да продуцираат негативни влијанија врз животната средина.
Зелените работни места се веќе препознаени како вредност во зачувувањето, обновувањето и унапредувањето на животната средина, во соодветната употреба на ресурси, во намалувањето на отпадот и управувањето со него, намалувањето на стакленичките емисии на гасови кое е во функција на намалување на аерозагадувањето и последиците од климатските промени, во заштитата и обновата на екосистемите, заштедата на енергија и суровини, промовирањето на обновлива енергија, во зголемувањето на енергетска ефикасност.
Се чини дека креирањето на зелените работни места е навистина остварливо во сите дејности, почнивајќи од истражувчките до производствените, дистрибуцијата и одржувањето, понатаму, во услужните дејности, како што се угостителството, туризмот и транспортот.
Тоа особено е изразено во новите дејности поврзани со високата технологија и обновливата енергија, во традиционалните индустрии како што се производство на стоки, во градежништвото, земјоделството и рибарството.
Во областа на образованието се отвораат нови можности. Секој може да го примени стекнатото знаење во врска со заштита на човековата околина, во текот на својата кариера во рамките на професионалната дејност.
Развојот на моделите на одржливо производство и потрошувачка овозможува создавање на сосема нови работни места или претворање на постојните во висококвалитетни зелени работни места.
Тие можат да бидат продуктивни, а истовремено да обезбедуваат солиден приход за работникот, социјална еднаквост и безбедност на работното место, социјална заштита за семејствата, личен развој и општествена интеграција, простор за слободно изразување на своите грижи поврзани со работата, како и еднакви можности и третман на сите вработени мажи и жени.
Поаѓајќи од премисата дека секој човек има право на живот, здрава животна средина и благосостојба, се доаѓа до заклучок дека зелените работни места стануваат се поголема неопходност.
Улогата на државата во водењето на климатската криза, креирањето на јавни политики и отворањето на зелени работни места е клучна.
објавено на: greencivil.mk
—
Линкови:
https://otgovori.info/kakvo-sa-zelenite-rabotni-mesta/
https://toniristov.wordpress.com/2015/12/01/zeleni-rabotni-mesta/
https://www.renovablesverdes.com/hr/zeleni-posao/
https://www.greens-efa.eu/legacy/fileadmin/dam/Documents/Publications/GND/Green_jobs_CR.pdf
https://www.davor-skrlec.eu/tag/zelena-radna-mjesta/
http://biologija.com.hr/modules/AMS/article.php?storyid=9588
