Здружението на новинарите на Македонија (ЗНМ) и Самостојниот синдикат на новинари и медиумски работници (ССНМ) веднаш го осудуија денешниот непримерен и омаловажувачки однос на градоначалникот на општина Карпош, Стевчо Јакимовски кон новинарите за време на изјавата пред Кривичниот суд.
На новинарските прашања упатени до градоначалникот Јакимовски денес пред судот, тој наместо да одговори во врска со судската постапка во која тој и неколкумина се обвинети за злоупотреба на службената положба и овластување како претходен градоначалник на општината Карпош, тој изјави дека имал одлични менаџерски способности и дека прашањата упатени од страна на новинарите кон него биле „смешни“. Исто така, тој ги обвини новинарите дека денешното присуство на медиумите и новинарите на првото рочиште било оркестрирано од страна на „еден центар“.ЗНМ и ССНМ потсетуваат дека градоначалниците се избрани функционери кои се платени од граѓаните и тие имаат обврска да негуваат професионален однос кон новинарите и медиумските работници, со цел да даваат отчет за својата работа и во ниту еден случај не може да биде оправдана лична пресметка на јавни настани. ЗНМ и ССНМ апелираат до засегнатите политичари да имаат поголема култура во јавната комуникација и односот со медиумските работници, бидејќи новинарите служат да ја информираат јавноста, а не да задоволат нечии партиски очекувања. ЗНМ и ССНМ апелираат, исто така, јавните личности, избраните функционери да се воздржат од изјави кои на било кој начин може да се сфатат како етикетирање на новинарите, бидејќи тоа не е во духот на европските и демократски вредности.
Со реакција се јави и Зоран Бојаровски, советник за медиумски реформи во Владата на РСМ, кој ги праша колегите новинари како се чувствуваат кога Јакимовски ги нарекува „срамота“ и „оркестрирани“?
„Кога ги нарекува вашите прашања смешни? И кога ви вели „имате ли други прашања“, а вие си молчите?! И кога во лице ве гледа и ви вели „смешни ви се прашањата, смешни ви се прашањата. Не ми се верува дека е ова состојба на „заробен ум“ зашто до пред две недели имавте соговорник чии што прес конференции траеја со часови, без да биде неодговорено ниту едно прашања, кој поттикнуваше и охрабруваше да поставувате прашања зашто тоа го бара вашата професионална одговорност, кој велеше дека секое прашање е резултат на слободата што ја освоивме сите заедно. Извинете, ама ако не знаевте -Не се сите исти. ЗНМ? ССНМ?“ – стои во Фејсбук објава од новинарот Зоран Бојаровски.
Рочиштето за предметот во кој актуелниот градоначалник на Карпош, Стевчо Јакимовски, е обвинет за злоупотреба на службената положба и овластување, што требаше да се одржи денеска, е одложено.
Обвинетиот Стевчо Јакимовски, до Судот приложил документација дека целото семејство на неговиот адвокат е позитивно на Ковид-19 и затоа и тој во моментов се наоѓа во изолација.
Според обвинението, во периодот од 2011 до 2017 година, како службено лице – градоначалник, Јакимовски во повеќе наврати ја злоупотребил службената положба и овластување во постапки за јавна набавка и во постапка за легализација на времени објекти од деловен карактер и приватизација на градежно земјиште сопственост на Република Северна Македонија.
