-Заклучно со денеска имаме 200.000 вакцини „фајзер“ со различен рок. Има доволно вакцини, најавени се и донации од европските земји, рече денеска министерот за здравство Венко Филипче.
Според него, нема конкретна информација кога ќе стигнат најавените 250.000 вакцини на „џонсон и џонсон“ од Данска.
-Беа најавени во два наврата – еднаш како информација и можност која ја прифативме и пред неколку недели со дефинитивна потврда дека може да се наменат за нашата земја. Рокот на тие вакцини е до 2023 година, но конкретен датум се уште не ни е јавен, рече Филипче.
Се уште нема конкретна информација за можноста да се набави вакцината „спутник“, рече Филипче, оваа вакцина во одреден период не беше на располагање. Сепак, во овој момент, како што напомена, има доволна количина од другите вакцини.
Разговаравме со претставниците на компанијата „Мерк“ за новиот антивирусен лек. Тоа е антивирусен лек со кој компанијата е најнапред отидена со студиите, кои практично се завршени. Освен оваа, и компанијата „Фајзер“ развива ваков антивирусен лек. Станува збор за лекови кои никако не ја менуваат вакцината, туку може да се дадат по дијагностицирање на болеста со соодветна индикација и кои се уште не се одобрени, истакна денеска министерот за здравство Венко Филипче.
При тоа, посочи тој, за лекот на „Мерк“ се завршени клиничките студии и Американската агенција за лекови на 30 ноември треба да има состанок на кој ќе го каже ставот во однос на дозволата за употреба.
– Ние на некој начин изразивме интерес за да има некаква форма на пререзервација на одредени количества за нашите пациенти во најкраток можен период, откако ќе завршат сите административни процедури. Клиничките студии на овој ист тип лек од компанијата „Фајзер“ не се се уште завршени. Веројатно ќе завршат во следните неколку недели, рече Филипче.
Во врска со Европскиот ковид сертификат, министерот истакна дека детална презентација ќе направат во петок.
– Имаме подготвена анимација со видео како се симнува, како се користи сертификатот од сајтот vakcinacija.mk, скенирање на кодот во двете апликации и за ајфон и за гугл системот преку апликација… Тоа е сертификат кој е целосно признат во сите земји од ЕУ, нешто на што интензивно работевме со „Ајфон“ и „Гугл“ за да се верифицираат тие апликации. Тие се веќе достапни за нашите граѓани, може да се симнат на мобилните телефони, но детално ќе објасниме в петок, додаде Филипче
