На територијата на целата држава меѓу малолетната популација до 18 години има 1068 активни случаи со Ковид-19. Во Институтот за белодробни заболувања во Козле се лекуваат 23 деца, само две се на кислородна поддршка и ниту едно не е во критична состојба, истакна денеска на прес-конференција министерот за здравство Венко Филипче, додавајќи дека во овој Институт е хоспитализирано и двомесечно бебе.
– Во однос на бројот на прегледи нема некое значајно отстапување. Има сосема лесно зголемување на бројот на деца кои се јавуваат на преглед, нагласи Филипче.
Во врска со скринингот на учениците, Филипче посочи дека тој е завршен во најголемиот број од училиштата во државата.
– Тестирани се над 5000 ученици, а 15 биле позитивни на вирусот. Сега е исклучително битно во периодот кој следи сите овие протоколи кои се пропишани да важат во училиштата, да се почитуваат како што треба за да се заштити целокупниот образовен процес, додаде Филипче.
Министерот Филипче соопшти дека во овој момент нема пациент кој примил трета доза вакцина, а е хоспитализиран.
-Досега, 99 пациенти вакцинирани со трета доза се дијагностиицани како позитинви и обично дијагнозата е четири до пет дена по примената трета доза. Има само еден смртен случај, но со друга тешка здравствена состојба, рече Филипче, одговорајќи на новинарско прашање дали има пациенти кои примиле трета доза и се заразиле со КОВИД, биле хоспитализирани или починале.
Филипче повтори дека како трета доза, се препорачува да биде примена вакцината Фајзер. Притоа е неважно која вакцина била аплицирана во првите две дози.
-Фајзер е препорачана да биде третата доза, независно која е првата и треба да се добие шест месеци од примената втора доза. Ова не ваќи за синофарм и синовак, како и за имунокомпромитирачките пациенти. Кај нив третата доза треба да се прими по три месеци од втората доза. Тоа се препораките секаде во светот кои и ние ги следиме, објасни Филипче.
Во врска со 22-годишното момче кое почина во Битола и чие семјство обвинуваше за лекарски грешки, министерот информира дека е завршен надзорот од Санитарниот инспекторат.
-Поднесени се веќе и документите до Лекарската комора за иницирање на стручниот надзор, рече Филипче.
