На 8 декември 2021, повеќе портали објавија информации дека „Цената на еврото надмина 62 македонски денари“.
Курир објави содржина со наслов „Еврото надмина 62 денари“. Ист наслов објави и Маркукуле: Евpoто надмина 62 денapи, а идентичен наслов објави и Нетпрес Еврото надмина 62 денари Денешен, пак напиша: „СТАБИЛНО И ПОД КОНТРОЛА“: Еврото надмина 62 денари. Дел објавија и табела на Народна банка од 07.12, за курсеви при вршење на платниот промет со странство за потребите на државните органи, од кои се гледа дека продажниот курс е над 62 денари.
Меѓутоа, Народна банка на Република Северна Македонија ги демантираше овие информации како погрешни.
„Погрешни се информациите кои излегоа на некои од порталите и на социјалните мрежи дека е покачен курсот на еврото. Во објавите се прави забуна помеѓу курсната листа за вршење на платен промет со странство за потребите на државните органи, со средниот курс кој е релевантен податок за вредноста на валутите. Девизниот курс на денарот е стабилен и нема промени во неговото ниво. Средниот курс на еврото според курсната листа на Н.банка изнесува 61,69ден. и истиот е непроменет во однос на лани. Во ова може секој да се увери доколку ја посети веб-страницата на Н.банка, каде секој ден се објавуваат овие податоци https://www.nbrm.mk/kursna_lista.nspx и која е единствен релевантен извор на информации според којшто населението и фирмите може да го следат девизниот курс на домашната валута.“, се вели во демантот на Народна Банка.
Ако се погледне курсната листа за платен промет со странство за државните органи во претходните месеци, може да се види дека продажниот курс во денари бил над 62 и претходно, на пример, на табелата од 23 септември 2021. Оттука, невистинито е и тврдењето изнесено во некои од написите дека ова е највисока цена на еврото во последните 5 години.
И Народната банка е во право. Порталите во случајов направија сензационализам со податоци од несоодветна табела. А место за сензационализам нема.
Но она за што секогаш треба да има место е одговорност и внимателност, и на институциите, и на медиумите, но и на публиката, особено со финансиски дезинформации кои знаат да поттикнат и вештачки финансиски потреси, па дури и редици пред банки и менувачници. Во случајов, Народна банка реагираше на време јавно за да спречи непотребна загриженост или паника. За жал, и овој пат потфрлија повторно – медиумите.
Автор и водител: Петрит Сарачини
Камера: Атанас Петровски
Монтажа: Ариан Мехмети
Стручен соработник на сценарио: Жарко Трајаноски
