ВЕСТ НА ДЕНОТ
Во Тирана денеска се потпишани како трилатерални, меѓу владите на Република Албанија, Република Србија и Република Северна Македонија, Договорот за условите за слободен пристап до пазарот на трудот на Западен Балкан, Договорот за интерконекција за шемите за електронска идентификација на граѓаните на Западен Балкан, и Договорот за соработка во областа на ветеринарството, безбедноста на храна и фитосанитарната политика.
Со овие договори, истакна на прес-конференцијата премиерот Заев, им овозможуваме на граѓаните на Северна Македонија, Албанија и Србија пристап до електронските услуги на националните портали на трите земји преку креирање електронска идентификација „Отворен Балкан” со што започнува остварувањето на можноста за олеснет и непречен пристап до пазарот на труд во трите земји.
ИЗЈАВА НА ДЕНОТ
„Отворен Балкан“ е процес од кој нема враќање. Нема ниту една причина да го напуштиме патот кој води кон исклучително блиска соработка во регионот. Нема зошто да отфрлиме пат кој води кон бришење на границите како административни бариери и кој ќе ни ги овозможи четирите слободи за движење на луѓето, стоките, услугите и капиталот. Во силните потенцијали на „Отворен Балкан“ остануваат идеите што веќе ги разговаравме и кои треба да бидат дел од следната фаза на нова, значајна соработка„, изјави премиерот Зоран Заев, на заедничката прес конференција на „Отворен Балкан“во Тирана.
*
„Парите потрошени за вооружување на државите треба да се пренасочат кон образованието“, порача денеска папата Франциск во својата годишна мировна порака, осудувајќи ги растечките воени трошоци.
ФЛЕШ ВЕСТИ
МВР Во големата полициска акција што се спроведува од претпладнето полицијата приведе десет лица од Куманово, Скопје и Тетово меѓу кои и полициски и царински службеници. Деветмина се сомничат дека извршиле кривично дело криумчарење, а тројца од нив за неовластена трговија со прекурсори, а кај еден бил пронајден и одземен кокаин.
Државната комисија за спречување на корупција (ДКСК) на продолжението на 57-та седница денеска донесе одлука за запирање на предметот против поранешниот претседател на државата Ѓорге Иванов за унапредување и именување на лица во Армијата.
ПРИЗНАНИЕ На публицистите Тошо Филиповски и Томислав Кежаровски и новинарите Аделина Марку и Марјанчо Николовски денеска им беше врачена државната награда „Мито Хаџи Василев-Јасмин“.
ОДБЕЛЕЖУВАЊЕ Припадниците на турската заедница во земјава денеска го одбележуваат Денот на настава на турски јазик, кој е единствен национален празник на Турците во Република Северна Македонија и од 2007 година е неработен ден за нив. Честитки стигнаа од државниот врв на Република Северна Македонија до припадници на турската по повод 21 Декември – Денот на наставата на турски јазик.
ДОГОВОР Министерот за надворешни работи, Бујар Османи и амбасадорката на Соединетите Американски Држави, Кејт Мери Брнз, денеска во Скопје го потпишаа Договорот меѓу двете влади за безбедносните мерки за заштита на класифицирани информации.
АКТИВНОСТИ НА ЦИВИЛ
ЦИВИЛ одржа панел дискусија „Помалите етнички заедници помеѓу статистиката и политиката“
Како се спроведе, кои беа предизвиците и кои се перспективите на пописот на населението 2021? – е главното прашање на кое дискутираат Суад Скендери – Ромалитико, Аделаид Каришиќ – Бошњачки истражувачки центар Скопје и Добре Митрев, Претседател на граѓанското здружение „Македонско – бугарско пријателство“. Настанот го модерираше Дехран Муратов од ЦИВИЛ.
Европски вредности на улица „Македонија“ во Скопје
Активист(к)ите на ЦИВИЛ денеска одржаа инфо-штанд посветен на промоција на европските вредности и интеграции, на улица „Македонија“ во Скопје.
На инфо-штандот, активист(к)ите на ЦИВИЛ во директна комуникација со граѓанките и граѓаните имаа можност да слушнат и споделат размислувања и ставови во однос на европските вредности, мултикултурализмот и недискриминацијата.
ДИСТРИКТ
Во Дистрикт на Цивил Прес Студио – интервјуто на Зоран Иванов со Гоце Михајлоски, главен и одгворен уредник на престижната „Канал 5“ Тв.
Тој зборува за: Новинарскиот пат од нула до главен уредник, зависноста на медиумите и слободата на новинарството, страничните влијанија врз уредувачките политики, актуелните политички случувања и за уште по нешто.
СЛОБОДНА ЗОНА
„Впечаток е дека и Ковачевски ќе составува „бизнис-менаџмент“ раководство на СДСМ, без многу постари, искусни партиски кадри, со познавања на пошироки „општообразовни“ теми (култура, историја, дипломатија, филозофија, идеологија…). Таков кадровски терк воведе Заев, што катастрофално му се одрази на профилот, а и перцепцијата за компетентноста на партијата во пошироката јавност (вон „дуинг бизнис“/докторските области), но во случајот на Ковачевски, барем на почетокот, факт е дека дискусијата во партиското раководство може да биде пожива и „поконсултативна“, во споредба со резервите на младите социјалдемократи пред досегашниот неспорен лидерски авторитет на Заев. Под услов Ковачевски и навистина, суштински да го преземе раководењето на партијата од и понатаму „активниот член“ Заев“, пишува Сашо Орданоски во колумната „А, што ќе се случува во СДСМ?“.
„За газдите на пропагандистите, непријатели се токму тие што вредно работат на одбрана и унапредување на човековите права и слободи. Пропагандата има задача да ги уништи тие идеи. Мора да ги уништи. За нив се страшни недискриминацијата, мултикултурализмот, европските вредности, социјалната правда, антинационализмот, одржливиот развој…
Не се добри и секако не се чисти нивните намери. Дури и кога ќе направат добра поента, тие ја прават не затоа што се засегнати со некоја неправда, туку затоа што се борат за позиција тие самите да прават неправда. Се обидуваат да ги фрлат во заборав или да ги релативизираат насилствата и криминалот во минатото. Се разбира, да ги затскријат и сопствените недостатоци – неписменост, неспособност, неморал… На подолг рок, тоа им ја дава можноста полесно да ги „правдаат“ своите недела и криминал, ако дојдат до позиции на моќ“, пишува Џабир Дерала во ЕДИТОРИЈАЛОТ насловен „Душегрижници“.
Д. Муратов
