Грубото кршење на меѓународното право е закана за цивилизацијата вели за ЦИВИЛ Медиа, претседателот Стево Пендаровски во однос на признавањето на регионите Донбас и Луганск, и наредбата за директна руска воена интервенција во Украина.
Претседателот Пендаровски изрази цврста поддршка за територијалниот интегритет и суверенитет на Украина. Тој додава дека поредокот базиран на меѓународното право е основа во меѓународните односи, чии принципи мора да се почитуваат.
По повод инвазијата на Украина од страна на Русија, претседателот Пендаровски изразува силна осуда за воените дејствија кои Русија ги презема над Украина, што неизбежно ќе водат кон ненадоместлива загуба на човечки животи и материјална штета.
„Инвазијата на Украина од страна на Русија е напад на територијалниот интегритет и суверенитет на Украина, сериозна повреда на основните принципи на меѓународното право, удар врз демократскиот поредок и закана за стабилноста на Европа. Како НАТО членка, се приклучуваме кон повикот на Алијансата насочен кон Русија за прекин на воените дејствија на територијата на Украина.
Во име на граѓаните на Северна Македонија, изразувам солидарност со украинскиот народ во овие тешки времиња“, истакна Пендаровски.
Во однос на прашањето на ЦИВИЛ Медиа за тоа како ќе влијае воената ескалација во Украина на економските и општествено-политичките состојби и процеси во Северна Македонија и земјите на Западен Балкан, информираме дека Кабинетот на претседателот е во комуникација со надлежните институции во земјава и во рамките на НАТО, околу можните сценарија кои тековно се изработуват во зависност од ситуацијата на терен, а кои се однесуваат на економските и политичко-безбедносните импликации од ескалацијата на состојбите меѓу Русија и Украина.
Претседателот Стево Пендаровски за денеска (24 февруари 2022 година) свика седница на Советот за безбедност на која ќе се дискутира за руската агресија врз Украина. Седницата ќе се одржи во Кабинетот на Претседателот со почеток во 14:00 часот.
Д.М.
