Генерал Хаџи Јанев: Ако сили на НАТО реагираат против руските сили тоа може да ескалира во невидени последици

По 77 години мир ова што започна утрово околу пет часот со нападот на Русија врз Украина ќе има далекусежни и несогледливи последици. Украина е под напад од копно, воздух и море. Копнените трупи влегоа преку Белорусија, рече генералот Методи Хаџи Јанев во изјава за Утрински брифинг.

На воено ниво, за оценка на оваа прва фаза, генералот Хаџи Јанев, кој беше наш претставник во НАТО во Брисел, вели дека ова е шок за сите, а особено за Балтичките земји.

-Русите ќе ги уништат воздушнте сили на Украина, со блиц криг ќе се преземат клучните точки со што Русија ќе се стекне со предност. Најстрашно е што украинскиот народ несомнено ќе одговори, а тоа ќе предизвика цивилни жртви како и голем бегалски бран, вели генерал Хаџи Јанев.Украинската армија важи за четврта по големина, но анализата е направена врз воениот капацитет што го поседува, но не се зема предвид застаренооста на оружјето и подготвеноста за војување на човечкиот фактор, коментира генерал Хаџи Јанев.

-НАТО сега треба да ги аплицира најавите за темелен конфликт. НАТО би требало да преземе соодветни мерки за одвраќање, а тоа е сериозно трупање на сили за да спречат прелевање на конфликтот. Она што е опасно е ако сили на НАТО реагираат против руските сили тоа може да ескалира во невидени последици, вели генерал Хаџи Јанев.