Четврти ден по ред Украина продолжува херојски да ја брани својата земја и да се спротивставува на неколкукратно поголемата армија на непријателот. Пресметката на рускиот режим да ја земе Украина за 6 часа и Киев за 2 часа не се оствари. Стоиме и ќе стоиме до крај, брифира Амбасадорката на Украина Наталија Задорожњук, (27.02.2022).
„Руските окупациски сили изведуваат моќни артилериски, воздушни и ракетни напади врз Украина, низ целата територија на Украина. Удираат по критичната инфраструктура – руските окупатори разнесоа гасовод во Харков, напаѓаат цивили. Во близина на Нова Каховка, руските нелуѓе застрелаа автомобил, во кој патуваше семејство, при тоа убивајќи пет лица, меѓу кои две деца, тенкови на Русија пукаа врз цивилен автобус.
Диверзантска група застрела цело семејство со три деца. Родителите и едно од децата починаа. Другите две деца се во болница со тешки повреди. Тоа се случи на улицата Олена Телига. Во близина на Бабин Јар, каде што пред 80 години нацистите убиваа цели семејства, вклучително и мали деца.
Во 21 век, постојана членка на Советот за безбедност на ООН врши геноцид врз соседна земја.
Вкупните загуби на руската армија во текот на трите дена од нејзината инвазија на Украина достигнаа 4.300 војници.
Додека украинските Вооружени Сили и граѓаните низ целата земја, кои се обединија во локални територијални одбрани, прават вистински подвизи секој час – ја бранат Украина од напредувањето на трупите на агресорот, уништуваат руски борбени единици и ги враќаат заробените градови, села и стратешки точки – во светот се случува уште една војна со агресор.
Ова е дипломатската војна.
И во неа Русија има просто невиден, неверојатен пораз.
Постапките на Путин ги одвратија од него дури и неговите најлојални сојузници во Европа. Не се работи само за Европа. Се создава јаз меѓу Русија и светот.
Му благодариме на целиот свет за вистинската практична помош. Санкциите се исклучително строги, благодариме за оружјето, благодариме за сите рестриктивни мерки, затворањето на небото за руските авиони и воздушната комуникација со земјата окупатор.
Русија е во изолација. Постои цивилизираниот свет и постои Русија, земјата агресор, која врши геноцид врз соседниот народ.
Би сакала да ги цитирам зборовите на познатиот руски економист Владислав Иноземцев, кој рече:
Западот, се разбира, требаше да биде порешителен и да ги воведе сите денешни санкции уште во деновите на окупацијата на Крим. Тогаш немаше да има војна во Донбас, ни несреќни жртви на MH17, ни сегашната срамна страница во руската историја. А, можеби, дури ни В. Путин…
Русија од држава која се стремеше кон светско лидерство, се претвори во држава отпадник.
На Русија итно и го одземаат правото да биде домаќин на сите спортски настани, дури и оние кои се планирани за наредните месеци. Дури и на такви настани од големи размери како финалето на Лигата на шампионите во мај и Светското првенство во шах во лето. Европските клубови одбиваат да го рекламираат „Гаспром“ и другите руски гиганти. Додека руските олигарси, кои поседуваат светски познати клубови како Челзи, се приморани да се откажат од својата сопственост.
Сето ова за Русија и за Путин е неверојатно понижување.
А следи уште една битка од не помали размери. Ова е битката за ООН. Украина иницира исфрлање на Русија од Советот за безбедност на ООН, каде што Москва беше запишана во 1992 година, со кршење на правилата и статутот на организацијата.
ООН се најде на работ на колапс. Бидејќи тоа, што постојана членка на Советот за безбедност на ООН врши отворена, апсолутно непредизвикана и однапред подготвена агресија врз соседна држава, ја уништува суштината на организацијата.
За крај, денеска во 15 часот (македонско време) ќе се одржи брифинг на Министерот за надворешни работи на Украина, Дмитро Кулеба за странските новинари.
Ги повикувам македонските новинари да се приклучат, па дури и оние кои продолжуваат да ги информираат своите читатели, користејќи руски извори.
Против Украина моментално се води не само реална војна туку и информативна“, истакна Задорожњук.
видео: Фронтлајн.мк
