САШО ОРДАНОСКИ
Конечно лидерот на опозицијата, машинскиот инженер Христијан Мицкоски, се зафати со работа која добро ја познава: производство на електрични автобуси во Македонија. За неговата политичка активност во земјава владеат противречни ставови, па така – според свежата анкета на ИРИ, правена пред само 5 месеци, а резултатите објавена вчера – Мицкоски има висока поддршка под 10% од анкетираните (и само 1% пониска од Заев – кој беше па тој Заев?!), но со најавата дека преговара за купување на 100 електро-бусови за престолнината, па и за производство на такви автобуси за извоз од Македонија, треба да се очекува дека поддршката неминовно ќе му порасне до феноменалниот двоцифрен процент од барем 10.2%!
Планот за постигнување на овој молскавичен успех за сега е таен, до толку што ни скопската градоначалничка Арсовска не ги знае деталите. Од опозицијата процениле дека ако со неа ги споделат информациите за решавањето на горливиот проблем со градскиот превоз во Скопје, таа со нејзе својствената ѝ ароганција и префинетото чувство за кавга ќе ја упропасти генијалната замисла, па решиле и неа и скопјани да ги стават пред свршен чин, како во народната: „Како се држи будала во неизвесност?… Ќе ти кажам за некој ден.“
Елем, за потребите на исполнувањето на предизборното шио-ми-га-Ѓуро-ветување дека годинава ќе се набави нов возен парк во ЈСП, седнал некој од ВМРО-ДПМНЕ на интернет и прогуглал кој произведува електрични автобуси во светот… Има, се наоѓа, 50-60 компании, од кои половината по Индии и Кини, но и нешто низ Западна Европа, Русија и Белорусија. Бидејќи Путин и Лукашенко се моментно нешто зафатени, претпоставувам дека се распрашале кој во партијата има некој брачед или сват што монтира нешто по овие евро-азиски фабрики и сигурно нашле некого кому, на пауза, му свртеле телефон (на вибер, да не се прави дополнителен партиски трошок)… Собрале квалитетни информации: цените на вакви автобуси се багателни, неколку стотици илјади евра по парче (зависи од должината, бројот на седишта, катноста, дневниот опсег на возење, металик бојата и електриката на предните стакла), плус резервни делови, батерии, продолжни кабли, специјализирани автобуски депоа, обуки, наочари за сонце, уште батерии, депонии за складирање на потрошените батерии и сл. И дошле до ѓутуре сума од 50-100 милиони евра трошок, ако се договорат домаќински, сосе провизии, данок, царина, хомологација, регистрација и уште некоја помала провизија. Плус транспорт франко Скопје.
Хмммм… Одокативно им се видела голема цифрата, па си рекле, а зошто да ги купуваме, кога овде може да се инвестира во таква фабрика, па цената да им падне барем за десетина отсто по автобус! Има логика во тој одржлив бизнис-план. И еден Субрата Рој би се воодушевил од него.
Се јавиле во фабриката со најдобра интернет понуда. „Ало, овде ВМРО-ДПМНЕ“… „Кој сте вие?“, прашала некоја неинформирана секретарка во Индија… „Ние сме македонска опозиција“… Молк од другата страна… „А-ха, е па дојдете на власт, па ќе ве поврзам со директорот“ – и им спуштила телефон!
Врз основа на овие детални преговори, Мицкоски само како политички тизер ја најави инвестицијата за електричните автобуси во Скопје. Наскоро ќе уследат компликуваните подробности од партиската говорница. Ќе се побара владина поддршка, банкарски гаранции, денационализација и експропријација на земјиште, нов кредит од ЕБРД, согласност од ТИРЗ за Бунарџик, две-три нови трафоа од ЕВН, дополнителен увоз на струја, зголемен ископ на јаглен за РЕК Битола и сл. Плус анонимните донатори на Арсовска за решавање на овој проблем.
Бидејќи сите надлежни институции од власта кога ќе ја видат сериозноста на презентацијата слатко ќе се изнасмеат, ќе следува бараж од 26 опозициски прес-конференции, 35 партиски соопштенија и 47 нови интервјуа на Мицкоски по режимските телевизии во кои државната власт ќе се прогласи за криминална, штетна и предавничка, затоа што не се грижи за олеснување на транспортниот проблем на скопјани. Дури тогаш и на Арсовска ќе ѝ се дозволи да искара десетина новинари, оти работат за корумпираната власт и поставуваат дополнителни логични прашања за брилијантниот начин за решавање на автобускиот јавен транспорт во главниот град.
Ете го 1.867-от успешен проект на новата локална власт, кој ќе пропадне заради корумпираноста на централната власт. Ем ВМРО-ДПМНЕ го решил јавниот транспорт во Скопје, ем одговорноста за тој неуспех ќе оди на товар на „пионот на Заев“.
Вонредни избори, нема друго чаре!
Сите права се задржани. Текстот е личен став на Авторот.
