Активисти на Шарената револуција пред два дена беа дочекани со громогласен аплауз на протестот во Нови Сад „Поддржи го РТВ“, кој се одржа поради смена на 14 новинари и уредници од информативната програма на јавниот сервис, Радиотелевизијата на Војводина. „Го имаш Пинк, врати го РТВ“, „Јас плаќам, јас гледам, јас бранам“, „Можеби го згаснавте светлото, но нема да го згаснете РТВ“ – беа дел од транспарентите кои можеа да се видат на протестот.
Пред илјадниците демонстранти собрани пред зградата на РТВ, новинарите изведоа импровизирана сатирична тв-емисија „Отворено студио“, во која учествуваа познатиот ТВ водител и новинар Зоран Кесиќ, новинарот од популарниот сатиричен портал Њуз.нет Виктор Марковиќ и блогерот Тибор Јона, со која се исмејуваа пропагандата на власта насочена кон оцрнување на протестите.
Веста за присуството на активисти на Шарената револуција ја пренесоа голем број на медиуми. И тамошните про-владини медиуми обвинуваат дека демонстрантите кои што протестираа пред РТВ се странски платеници, и го врамија присуството на Шарените револуционери во контекст на меѓународна завера против тамошната власт.
Инаку, во Нови Сад за овој петок е веќе најавен и контрапротест на поддржувачите на власта, со мото „Стоп на анархијата“.
