Финска во рок од неколку недели ќе донесе одлука за можна кандидатура за членство во НАТО како резултат на руската инвазија на Украина, изјави денеска во Стокхолм финската премиерка Сана Марин, пренесува МИА.
– Мислам дека тоа ќе се случи наскоро. Зборуваме за недели, а не месеци, рече таа на заедничката прес-конференција со нејзината шведска колешка Магдалена Андерсон.
До неодамна, мнозинството Финци не сакаа членство во НАТО, но, руската инвазија на Украина ги натера на некои преиспитувања на ставовите. Најновите анкети покажуваат дека сега мнозинството дава поддршка за членството во Алијансата.
Шведска, исто така, не ја исклучува можноста за приклучување кон западната воена алијанса.
Русија веќе ги предупреди и Финска и Шведска дека е против нивно придружување на НАТО. Според Русија, потегот нема да ѝ донесе стабилност на Европа.
Неколку часа по предупредувањето на Москва, за изјавата на Хелсинки, за влез на Финска во НАТО, на територијата на Русија е забележано движење на тешко вооружување кон границата со Финска. Особено се евидентира движењето на мобилни ракетните системи К-300П „Бастион-П“, кои се користат за уништување на воени бродови.
