Во МОШ Бар во Скопје денеска се одржa прес-конференција на која беа соопштени резултатите од донаторската акција за собирање помош за украинските бегалци во земјава.
На прес-конференцијата денеска се обратија главниот иницијатор на оваа акција, заменик-народен правобранител Јован Андоновски, заедно со Роман Буга, заменик-амбасадорот на Украина во Скопје и Александар Урбанович, Претседател на здружението на Украинци во Македонија – „Лесја Украинка“.
Заменик народен правобранител, Јован Андоновски
Андоновски ги посочи проблемите со кои се соочуваат украинските бегалци кои престојуваат во замјава, како и потребата преку личен пример да им се помогне на лицата во невоља и кои се буквално дојдени во земјава со само една торба лични работи.
Помошта што се собира е само една капка во морето, бидејќи проблемите на бегалците се далеку посериозни, истакна Андоновски.
„Со статусот што го имаат моментално, украинските бегалци не можат да пристапат до пазарот на трудот, односно, не можат да дојдат до вработување, следствено на тоа, не можат да остваруваат сопствени извори на приходи, а тоа е сериозен проблем затоа ѓто многумина од нив немаат средства за живот,“ изјави Андоновски.
Според Андоновски, државата треба да преземе конкретни мерки , бидејќи никој не знае колку ќе трае оваа состојба. Тој како пример наведе дека само во соседна Бугарија има неколку десетици илјади бегалци од Украина кои беа згрижени во хотелите на Црноморието. Од нив е побарано на 1 јуни да го напуштат сместувањето, бидејќи им почнува туристичката сезона. Можно е тие бегалци да дојдат во нашата земја.
Како уште еден проблем, Андоновски го посочи тоа што децата не можат да бидат примени во градинка или училиште, со што им се скратуваат основните права, како што е правото на образование, згрижување и едукација.
Исто така, бегалците од Украина, без разлика дали се деца или возрасни, не е решен ни пристапот до здравствена заштита, и покрај ветувањето од тред повеќе од два месеци месеци дека ова прашање ќе биде решено.
„Има и мали деца, има и возрасни луѓе, и за нив не е решен уште еден проблем, а тоа е пристапот до здравствена зашита. Што е сериозен проблем поради тоа што меѓу двете држави не постои билатерален договор за регулирање на тоа прашање. Доколку имаат потреба, тие се приморани сега да платат за услугата, а голем дел од овие лица немаат ниту базични средства за живот. Државата да ја покаже својата големина и хуманост, без разлика колкав е бројот на овие лица. Проблемот не мора да се реши со билатерален договор, туку може да се реши и со одлука на извршната власт,“ изјави Андоновски.
Андоновски посочи дека Амбасадата го има покренато ова прашање уште пред неколку месеци.
„Колку што знам јас, било ветено дека истото ќе биде направено. Поминаа 2-3 месеци и нема никаков исход,“ изјави Андоновски.
На пресот се обратија и Роман Буга, заменик-амбасадорот на Украина во Скопје како и Александар Урбанович, Претседател на здружението на Украинци во Македонија – „Лесја Украинка“, кои се заблагодарија на организаторите на оваа акција, како и на поддршката која Украина ја добива од нашата земја во ова тешко време, кога поради војната, надвор од границите на Украина престојуваат повеќе од 4 милиони Украинци.
Заменик амбасадор на Украина, Роман Буга
„Многу сме среќни што луѓето од вашата земја даваат силна поддршка на нашата земја, на нашите Украинци, во ова тешко време во кое веќе четврти месец во Украина владее страшна војна. Многу луѓе ги напуштија своите домови, својата земја, за сите нив е потребна голема поддршка, како материјална, така и морална. Сите видови на поддршка се добредојдени. Затоа сме ви благодарни на сите. Велите дека сте мала земја, но ние секојпат одговараме дека имате големи срца и токму оваа ситуација покажува дека вистинските пријатели се гледаат во тешки времиња,“ рече Буга и уште еднаш се заблагодари за огромната поддршка.
