ВЕСТ НА ДЕНОТ
Голем пожар во Тетово
Утрово се запали индустриски објект во Тетово на излезот од градот во складот на фабриката за градежни материјали на фирмата „Пофикс“ кои се наоѓаат во поранешните простории на „Македонија Табак“. Во гаснењето учествуваа и полициски хеликоптери.
Десетина лица побарале лекарска помош поради задушување и тешкотии од вдишан чад, а меѓу повредените и оние кои побарале лекарска помош има граѓани и пожарникари. Во моментов пожарот го гасат пожарникари од Тетово, а на помош дојдоа и од скопската противпожарна единица бидејќи пожарот е голем и се шири кон останатите магацински простории.
Општина Тетово денеска донесе одлука да се прекине наставата во тетовските основни и средни училишта бидејќи воздухот е многу загаден како последица од пожарот.
ИЗЈАВА НА ДЕНОТ
Пендаровски: Може да има предвремени избори, ама што ќе се реши со тоа?
Претседателот Стево Пендаровски за Утрински брифинг изјави дека предвремени избори може секогаш да има и дека тоа е легитимно барање, но се поставува прашањето тоа ќе се реши со еден таков потег.
„Јас мислам дека предвремени избори нема да решат ништо. Ниту ќе се реши проблемот со бугарското вето, ниту ќе се постигне договор, ниту ќе се решат економските проблеми од кои добар дел се увезени со украинската воена криза. Мене ме интересира што нова политичка структура на власт би донела за граѓаните и државата“.
ВОЈНА ВО УКРАИНА
На 96 ден од војната во Украина, руските агресори не престануваат со офанзивни операции во источната оперативна област, украинската армија ги одбива нападите.
Како дел од логистичката поддршка и надополнувањето на настраданите единици со жртви, руската војска распореди повеќе од 250 единици на оружје и воен хардвер за привремено окупираните населби. Со цел да се зголеми ефикасноста на распоредувањето од војници и хардвер, непријателот го обновил железничкиот мост во близина на градот Купјанск (Регионот Харков).
Во правец на Доњецк, единиците на агресорот се фокусираат на офанзивни операции за да ги опколат нашите трупи во областите Лисичанск и Северодонецк (регионот Луганск) и да ги блокираат главните логистички правци.
Насилното пренесување на Украинците од привремено окупираните територии од страна на руските напаѓачи е геноцид, се наведува во меѓународниот правен извештај „Независна правна анализа на прекршувањата на Руската Федерација на Конвенцијата за геноцид во Украина и должноста за спречување“, пренесува Укринформ.
Русија објави дека над 1 милион луѓе, вклучително и повеќе од 180.000 деца, биле преместени од Украина во Русија од почетокот на целосната инвазија, се вели во документот.
ФЛЕШ ВЕСТИ
ИНТЕРПЕЛАЦИЈА Пратеничката група на ВМРО-ДПМНЕ и коалицијата „Обнова за Македонија“, денес официјално ја поднесе Интерпелацијата за работата на Претседателот на Собранието, Талат Џафери.
ФОРУМ Започна Скопскиот економски и финансиски форум, главен говорник нобеловецот Пол Кругман.
ФИСКАЛНА ОДРЖЛИВОСТ Имајќи ги предвид предизвиците со кои се соочуваме, владите мора да имаат одговор за фискална одржливост и да ги заштитат најранливите од влијанијата, порача од Скопскиот економски и финансиски форум потпретседателката на Светската банка за Европа и Централна Азија Ана Бјерде.
ЗАЛОЖБИ Премиерот Димитар Ковачевски во воведното обраќање при отворањето на меѓународната конференција „Скопски економски и финансиски форум“ СЕФФ2022, ги истакна приоритети на Владата за справување со предизвиците во услови на најголемата глобална енергетска криза, мерките за ублажување на ценовниот раст и за задржување на ликвидноста на компаниите, информираат од владината прес служба.
ЕМБАРГО Амбасадорите на земјите-членки на ЕУ од утрово повторно интензивно се обидуваа да ги приближат ставовите околу нафтено ембарго на ЕУ врз Русија, според последните информации постигнат е мал напредок.
ЦИВИЛНИ АКТИВНОСТИ
АНКЕТА
Граѓан(к)ите на Штип не им веруваат на медиумите и политичарите, бидејќи според нив, постојано шират лажни вести, пропаганда и дезинформации.
СЛОБОДНА ЗОНА
„Геостратешките промени на Стариот континент започнале со аншлусот (присоединувањето) на Австрија со Германија во 1938 година и создавањето на Голема Германија, кое минало молкум кај меѓународната заедница. Но апетитите на Хитлер оделе понатаму и тој ја предизвика Судетската криза, меѓународен конфликт заради барањето на Хитлер по секоја цена да анектира област од делот на Чехословачка во кој живеело германско малцинство. Трите милиони Германци требало, велел тој, да бидат „вратени во германскиот Рајх“.
Чуму ваков вовед за темата „присоединување“ во Европа. Па, заради неодамнешниот говор на американскиот дипломат Хенри Кисинџер на Форумот во Давос.“, пишува Љубомир Костовски во анализата „Планот на Кисинџер и сенката на Невил Чемберлен“.
„Експанзионистичката и империјалистичка политика на Путин и Русија денес во многу работи наликува на политиката на Сталин и СССР по Втората светска војна. Да потсетиме, под диктат на Сталин и Советскиот сојуз, Информбирото ја донесе својата фамозна Резолуција против Југославија во 1948-та година во Букурешт. И називот на резолуцијата беше дел од Сталиновата пропаганда против Тито: „Југословенската комунистичка партија во рацете на шпиони и убијци“. КПЈ беше осудена и изолирана поради одбивањето да биде послушна на диктатите на СССР, а Тито беше пропагандно оцрнуван како „нацист“, „шпион“, „убиец“ и платеник на Западот.“, прочитајте во анализата „Тито му кажа „НЕ“ на Сталин, Македонија му кажува „НЕ“ на Путин!“
Д. Тахири
