ВЕСТ НА ДЕНОТ
Четири високообразовни институции ќе ја воведат медиумската писменост во наставната програма
Четири високообразовни институции од државава добија грант за воведување медиумска писменост во студиските програми во рамки на проектот на УСАИД за медиумска писменост „Младите размислуваат“, што го реализираат ИРЕКС заедно со Институтот за комуникациски студии (ИКС).
Станува збор за Филолошкиот факултет „Блаже Конески“ и Педагошкиот факултет „Св. Климент Охридски“ при Универзитет „Св. Кирил и Методиј“, Универзитетот на Југоисточна Европа и Американскиот универзитет на Европа – ФОН .
Факултетите биле избрани на првиот јавен повик на ИКС и ИРЕКС во рамките на проектот за медиумска писменост на УСАИД, со цел да ги поттикне високообразовните институции да работат со студентите и да ги унапредуваат истражувањата во областа.
ИЗЈАВА НА ДЕНОТ
Зеленски: Секој човек е важен, тоа е главната работа што не разликува од окупаторите
Принципите на нашиот живот се сосема различни. И иако животот се промени со почетокот на војната, нашите принципи остануваат исти. Секоја личност е важна. Ова е главното нешто што не разликува од окупаторите, изјави украинскиот претседател Володимир Зеленски.
„Како малиот Денис од регионот Житомир, од селото Малинивка, кој загина со целото семејство кога руски авион фрли бомби врз селото. Денис имаше помалку од две години.
Како Степан од селото Нови Петривци, Киевската област. Имал неполни три години кога руска граната го погодила дворот. Детето беше смртно рането.
Како и Ања од Буча, регионот Киев, таа имаше 14 години. Таа беше убиена кога руската војска пукаше во минибус на патот. Луѓето само се обидуваа да избегаат. Ања била во тој автомобил со мајка и и баба. Сите загинаа.
Полина, немаше ни две години. Руски тенк пукаше во куќа во Бородјанка. Обична куќа. Директен удар. Полина почина.
Арина, регионот на Миколаев. На 5 март таа се здоби со рани од шрапнел како резултат на артилериско гранатирање, окупаторите го погодија вообичаениот станбен сектор. Таа почина во болница. Сега, во јуни, Арина би можела да има 4 години.
Свјатослав од Одеса, имаше 15 години. Тој беше убиен од руски ракетен напад во студентски дом. Тоа се случи на 2 мај. Неговото тело беше извлечено од урнатините на куќата.
Алиса од Охтирка, регионот Суми. 7-годишно дете. Таа загина на вториот ден од целосна војна како резултат на руско артилериско гранатирање. Окупаторите едноставно пукале кон куќите.
Микита од градот Изум, регионот Харков. Имаше 3 години. Ноќта на 3 март тој беше убиен од руски воздушен напад врз градот. Вкупно девет лица загинаа таа ноќ.
Две сестри – Варвара и Полина од Мариупол. Варвара имаше 14 години, а Полина 11. Тие загинаа како резултат на руското гранатирање на станбена зграда.“
Зеленски именуваше само десет деца од списокот од двесте четириесет и три. И тоа не се само бројки. Секоја линија е посебен свет што беше уништен од руската армија.
На оваа листа има и такви за кои воопшто ништо не се знае, па дури и името… 243 деца! Вечен спомен на сите на кои животот им го одзеде руската војна против нас, против Украинците, против Украина, рече Зеленски.
ФЛЕШ ВЕСТИ
КОНФЕРЕНЦИЈА Денеска се одржа втората конференција на Асоцијацијата: Центар за анти-тероризам и мир “Гардијан”- Куманово, која беше посветена на пост-Ковид состојбата на глобалната и регионалната безбедност, состојби, перспективи и предизвици.
На конференцијата се обрати и претседателот на ЦИВИЛ, Џабир Дерала кој зборуваше за „Местото и влијанието на медиумите во сферата на безбедноста“, но се осврна и на влијанието на дезинформациите и пропагандата врз стабилноста и безбедноста на едно демократско општество.
ПОЖАР Во гасењето на пожарот што се случи во поранешниот тутунски комбинат во Тетово, сегашна фабрика за производство на минерални материи биле ангажирани вкупно 216 лица, два хеликоптери, еден армиски и еден полициски, 22 цистерни, 21 машина, како и осум виљушкари, информираше на денешната прес-конференција Стојанче Ангелов, директор на Центарот за управување со кризи (ЦУК).
ПРОТЕСТ Сојузот на синдикати на Универзитетот „Св. Кирил и Методиј“ денеска пред Ректоратот на УКИМ одржа мирен протест изразувајќи незадоволството од, како што велат, за влошената материјална положба на вработените.
ПОСЕТА Заменикот народен правобранител е во посета на Украина каде се сретна со својата украинска колешка Ирина Сивитска со која разговараше за клучните прашања на Украинците кои се наоѓаат во Северна Македонија, информираат од тимот на заменик правобранителот.
ЕКОНОМИЈА Според Стопанската комора на Северозападна Македонија (СКСЗМ), не може да се надмине кризата ако фалат капитални инвестиции кои треба да ја заживуваат економијата, ниту може да се надмине кризата без адекватни фискални и даночни политики и олеснувања, без соодветно да се помогне бизнисот како најголем работодавач во земјата, а притоа имаме преоптоварена јавна администрација која троши многу и е непродуктивна.
АНТИКОРУПЦИЈА Недолжни граѓани го запишуваат имотот на функционери на нивно име за што добиваат противуслуга и кога ќе им заврши функцијата тие си го враќаат тој имот на свое име, изјави вечерва претседателката на Државната комисија за спречување на корупцијата (ДКСК), Билјана Ивановска.
ВОЈНА ВО УКРАИНА
Полска го поддржува пристапувањето на Украина во ЕУ и НАТО и ќе работи да го добие Украина кандидатски статус за членство во ЕУ овој јуни, изјави премиерот Денис Шмихал за време на брифингот со премиерот на Полска Матеуш Моравјецки на 1 јуни.
Во областа Мариупол во регионот Доњецк, руските окупатори затвораат и пукаат во украински доброволци и службеници, пренесува Укринформ.
„Во областа Мариупол, окупаторите затвораат и пукаат во украински доброволци и функционери. Сите одбија да соработуваат со колаборационистите и со окупаторската власт“, објави градскиот совет на Мариупол на Телеграм, цитирајќи го градоначалникот на Мариупол, Вадим Бојченко.
Украинскиот претседател Володимир Зеленски се обидува да обезбеди безбедно враќање на украинските деца кои беа принудени да ја напуштат земјата поради војната што ја започна Русија. Зеленски зборуваше на состанокот во средата на Советот за прашања поврзани со животот и безбедноста на децата во време на војна и разговараше со деца во Украина и во странство, пренесува Укринформ, повикувајќи се на прес-службата на претседателот.
Русите уништија 20% од училиштата и градинките низ Украина, во соработка со УНИЦЕФ развиен план за обнова до 1 септември.
МУЛТИКУЛТУРА
Мултикултурализмот и (не)дискриминацијата во институциите и општеството
ЦИВИЛ денеска одржа јавен настан на тема „Мултикултурализмот и (не) дискриминацијата во институциите и општеството“.
На настанот се говореше за младите и нивното спознавање на мултикултурализмот, институционалната застапеност, (не)дискриминацијата на општествено и институционално ниво, низ разговори со неколку општествени и политички чинители.
ДЕЗИНФОРМАЦИИ
„Постојат организирани центри за ширење на лажни вести и пропаганда, и многу се посилни тие во исток, односно во Москва. Русија гледа на секој начин, не само на нас како кандидат за земја членка за влез во ЕУ, а земја која веќе е влезена во НАТО, меѓутоа истата пропаганда ја водат и кон земјите што некогаш припаѓале на источниот блок“, вели за ЦИВИЛ Медиа, новинарот Александар Николиќ Писарев.
Д. Тахири
