На панел дискусијата на Зелен ЦИВИЛ на тема „Зелени перспективи: отпад, регулација на отпад, состојби и решенија“, заменик министерката за животна средина и просторно планирање, Христина Оџаклиеска, зборуваше за регионалните депонии, Законот за заем, соработката меѓу институциите и општините, како и за свесноста кај граѓаните за чиста животна средина ослободена од отпад.
„Министерството за животна средина и просторно планирање донесе шест законски акти во сферата на управување со отпадот, кои добија поддршка од мнозинството пратеници во Парламентот и со нив воведуваме нов процес за циркуларна економија или искористување на отпадот како суровина. Се работи за пет регионални депонии затоа што за Североисточниот и Источниот регион веќе сме во некоја понапредна фаза, таму се обезбедени средства од ИПА-2 програмата. За овој заем станува збор за изградба на регионални депонии во југоисточниот, Југозападниот регион, во Пелагонискиот, Вардарскиот и во Полошкиот регион. Јас се надевам дека ќе добиеме поддршка од општините. Сметам дека мора да има блиска соработка меѓу централната и локалната власт во однос на изградбата на регионалните депонии“, изјави Оџаклиеска.
Регионалните депонии треба да претставуваат одржлив систем за управување со отпад кој треба да го реши расфрланиот отпад што го среќаваме наоколу.
„Јас ги поддржувам сите еколошки акции за собирање на отпад. Тоа е добро и треба да ги има. Но уште подобро е да се воспостави систем и тој да функционира. Големата количина на собран отпад во одредена акција, не покажува нешто позитивно, туку покажува дека има слабост, дека нема систем што функционира. Затоа е важно, општините, откако ќе се исчистат локациите, да им се даде намена или нова содржина на просторот за да не прераснуваат повторно во диви депонии. Во периодот што следи мора да се зајакнат капацитетите на општините и да се спроведуваат законите што ги носиме.
Постои отпор кон изградба на регионалните депонии затоа што граѓаните имаат перцепција дека станува збор за места кои утре ќе прераснат во диви депонии. Регионалниот систем за управување со отпад треба да воспостави ред. При изборот на локацијата се внимава и на економската исплатливост, оддалеченоста на одделните општини од самото место на претоварните станици каде што се предвидува префрлање на отпадот. Неопходно е што поскоро да се започне со изградба на регионалните депонии. Иако законот го дозволува тоа досега МЖСПП, нема одземено ингеренции на некоја општина, ниту на еден градоначалник за постапување со отпад. Но, доколку бидеме во таква ситуација не смееме да дозволиме изградбата на еден ваков регионален систем да зависи од еден личност која што е четири години на власт, а станува збор за долгогодишно управување на отпадот
Ние мораме да размислуваме отпадот што го имаме кај нас го вклучиме како производ. Податоците што ги имаме не одговараат на реалните состојби и мислам дека треба да се поработи на подобра евиденција на количините на отпад кои се рециклираат и кои повторно се употребуваат“, вели Оџаклиеска.
„Сметам дека нашите граѓани се свесни. И мене како човек ми смета кога ќе видам неуреден простор околу местото каде живеам. Граѓанските здруженија се доста гласни по оваа тема и тие помагаат за подобро спроведување на зелените политики. Животната средина е стил на живеење, не е само политика и мислам дека граѓаните се свесни и знаат што бараат“, истакна заменик-министерката.
Б. Јордановска
камера: Атанас Петровски
монтажа: Ариан Мехмети
