ВЕСТ НА ДЕНОТ
Ковачевски: Отворени се преговорите со Европската Унија
Претседателот на Владата на Република Северна Македонија, Димитар Ковачевски, по повод почетокот на скрининг процесот за членство на Северна Македонија во Европската Унија, истакна дека после 17 години ЕУ денеска во Брисел го започна скрининг процесот за Северна Македонија за членство во Европската Унија.
„Отворени се преговорите со Европската Унија! После 17 години чекање, денеска во Брисел се отвори скрининг процесот за Северна Македонија за членство во Европската Унија. Започнуваме процес во кој ќе се продлабочат суштинските реформи за имплементација на европските регулативи, за европеизација на општеството и за европско функционирање на државата. Денешниот ден е навистина голем и важен за иднината на сите граѓани во нашата земја, тие заслужуваат да живеат во стабилно, демократско и европско општество. Посакувам успешна работа, македонскиот тим е подготвен за предизвикот“, истакна Ковачевски.
ИЗЈАВИ НА ДЕНОТ
„Советниче, кога лажете и мавтате со документи, ви се тресе рачето и ви трепери гласот. Каде е шпицниот градоначалник, не го гледам тука? Кај се крие Мицкоски? Во ВМРО-ДПМНЕ има многу чесни, вредни, храбри луѓе. Мицкоски за жал не е еден од тие. Како до вчера бев најдобар градоначалник на Скопје, а откако ви го фатив директорчето со рачето во медот сега од еднаш не чинам.
Поранешниот премиер на Република Северна Македонија, Зоран Заев, објави видео со честитка по повод Денот на демократијата.
„Нека ни е честит и вечен Денот на демократијата, 15 септември. Денес имаме владеење на народот. Денес одлучуваат тие кои гласаат. А, не оние кои бегаат. Демократијата е глас. Гласот на секој еден поединец. Глас слушнат, разбран, уважен, испочитуван. Гласот на сите групи во нашето општество“, порача Заев.
ФЛЕШ ВЕСТИ
ИНТЕГРАЦИИ Во Брисел денеска официјално почнува скринингот за усогласеноста на македонското законодавство со тоа на Европската Унија. Вицепремиерот за европски прашања Бојан Маричиќ за МИА, по повод отпочнување на оваа фаза од нашето пристапување кон ЕУ, вели дека скринигот практично е фаза на дијагноза до каде сме и што треба да правиме.
ПРАВДА Иницијатива за распишување референдум има прилично правни аномалии, недостатоци што ја прават недоволно добра од правен аспект за постигнување на една замислена цел, потенцијална, каква и да е, изјави денеска министерот за правда, Никола Тупанчески.
ВОЈНА ВО УКРАИНА
Украинскиот претседател Володимир Зеленски денеска и врачи орден „Јарослав Мудриот“ на претседателката на Европската комисија, Урсула фон дер Лајен, која беше на посета во Кијив.
*
Катастрофалните загуби на Кремљ во Украина може да резултираат со колапс на Руската Федерација
Станува сè појасно дека Украина ќе победи во оваа војна и дека Кремљ се соочува со историска криза на доверба. Навистина, сега верувам дека е вистинска можност откриените слабости на Владимир Путин да се толку сериозни што можеби ќе бидеме сведоци на почетокот на крајот – не само на неговиот режим, туку и на самата Руска Федерација, пишува Бен Хоџис за лондонски Телеграф.
*
Украинскиот претседател Володимир Зеленски, во објава на Телеграм изјави дека секој ден патот кон враќањето на сите привремено окупирани украински територии е се почист.
*
Автомобилот на украинскиот претседател Зеленски се судри со возило во Киев во средата, но не се здоби со поголеми повреди, објави прес секретарот Серхиј Никифоров на Фејсбук. Никифоров додаде дека полициските службеници ја истражуваат несреќата.
ЦИВИЛНИ АКТИВНОСТИ
Оваа година, се навршуваат 15 години откако светот започна да го одбележува Меѓународниот ден на демократијата, 15 септември. Овој ден се одбележува секоја година низ светот за да се зајакне демократијата и да се истакнат нејзините вредности и принципи. Оваа година, Денот на демократијата ќе се фокусира на важноста на слободата на медиумите за демократијата, мирот и исполнувањето на целите за одржлив развој.
ЦИВИЛ им го честита Меѓународниот ден на демократијата на сите граѓанки и граѓани во земјата и во светот, со повик за почитување на начелото за владеење на демократијата и правото, и порачува дека декларациите за демократски свет треба час поскоро да се претворат во дела.
*
Книгата на жалост по повод смртта на Кралицата Елизабета II во Британската амбасада Скопје, која беше отворена во петок, на 9 септември ќе биде достапна до четврток, 15 септември од 10.30 до 14.00 часот. Во книгата на жалост пораки на сочуство испратија и претставници на Цивил – Центар за слобода.
*
ЦИВИЛ ја продолжува серијата настани Зад димната завеса: Со референдумот, или на него со панел дискусија што ќе се одржи на 16 септември (петок), со почеток во 13 часот, во Прес студиото на организацијата.
Учесници на панелот ќе бидат Благојче Атанасовски, политиколог, и Зоран Димитровски од Демократски сојуз, а настанот ќе го модерира Џабир Дерала, ЦИВИЛ.
ГОВОР НА ОМРАЗА
Експлицитен говор на омраза на социјалните мрежи од „топлиот, мирољубив и гостопримлив“ македонски народ по објавувањето на веста дека претседателот на државата Стево Пендаровски и неговата сопруга ќе присуствуваат на погребот на кралицата Елизабета.
Д. Муратов
