„Денес, Окружниот суд во Хаг ги прогласи за виновни и ги осуди на доживотен затвор трите лица одговорни за соборувањето на Боинг 777 на летот MH17 на Malaysia Airlines од Амстердам за Куала Лумпур на 17 јули 2014 година. Како последица на ова ужасно злосторство ги загубија животите сите 298 невини луѓе, вклучително и 80 деца. Пресудите на Судот се забележителен настан во контекст на воспоставувањето на правдата и неизбежноста на казнување за извршување на кривични дела. Тоа стана можно поради постојаната и методолошка работа на десетици истражители и обвинители на Заедничкиот истражен тим, вклучително и украински“, соопштуваат од украинското Министерство за надворешни работи.
Оттаму велат дека пресудите се и знак дека оние кои донеле одлука и наредиле соборување на цивилен авион на крајот ќе завршат во судницата. Казната на тие сторители е неизбежна.
„Освен поединци, ќе одговара и Руската Федерација како држава. Пренесувањето на Бук-ТЕЛАР на терористи е очигледно кршење на меѓународното право, конкретно, на Меѓународната конвенција за сузбивање на финансирањето на тероризмот. Таквото пренесување на ова смртоносно оружје во Украина е клучен елемент во случајот на Украина против Русија во Меѓународниот суд на правдата“, истакнуваат од Министерството.
Украина ќе продолжи да ги координира напорите со своите партнери за утврдување на вистината и правдата за жртвите од трагедијата MH17, како и за нивните семејства, кои продолжуваат да жалат за загубата на своите најблиски, се наведува во соопштението од укјраинското МНР.
И украинскиот претседател Володимир Зеленски ја поздрави пресудата на холандскиот суд за соборениот малезиски авион
Зеленски на Твитер одлуката на судот ја нарече „важна“, но нагласи дека на оние кои го наредиле нападот сега мора да им се суди.
Important court decision in The Hague. First sentences for the perpetrators of #MH17 downing. Holding to account masterminds is crucial too, as the feeling of impunity leads to new crimes. We must dispel this illusion. Punishment for all RF’s atrocities then & now is inevitable.
— Володимир Зеленський (@ZelenskyyUa) November 17, 2022
„Затоа што чувството на неказнивост води до нови злосторства“, напиша тој на социјалната мрежа.
Украинскиот претседател увери дека „казната за сите руски злосторства, и сегашни и минати, ќе биде неизбежна“.
„Мора да има крај на оваа илузија дека меѓународната правда нема да ги пронајде и осуди одговорните за злосторствата во сегашната војна со Русија“, повика украинскиот претседател на Твитер.
Подготви: Ј. Ѓ.
