ВЕСТ НА ДЕНОТ
Северна Македонија ги доби првите 110 милиони евра од ММФ
Република Северна Македонија ја добива првата транша од 110 милиони евра од вкупно одобрените од Меѓународниот монетарен фонд преку Инструментот за претпазливост и ликвидност (ПЛЛ). Средствата стануваат достапни откако Одборот на директори на ММФ ја одобри двегодишната програма на Република Северна Македонија во рамки на Инструментот за претпазливост и ликвидност.
ИЗЈАВА НА ДЕНОТ
Државата мора да ги контролира фирмите феномени на екстра профитот. Јас таквите компании ги нарекувам „супер профит мејкери“. Сериозни држави не толерираат компании кои остваруваат екстра профити надвор од сите логични економски стандарди, некои држави знаат таквите компании и да ги конфискуваат. Нашата држава се плаши. Ако ништо друго таквите компании барем треба екстремно да ги оданочува. Да ги оданочува профитите остварени во вонредни околности. Но нашите влади тоа не го прават. А зошто нашата влада тоа не го прави? Па не го прави затоа што се плаши, затоа што нема смелост. А нема смелост затоа што мисли дека наводно бизнисот има огромно влијание во политиката што сметам дека и е погрешно. На пример, на што личи за даночни реформи да одите да го прашате големиот бизнис. Што очекувате дека оттаму можат да ви кажат, вели академик Абдулменаф Беџети во интервјуто за Слободна ТВ.
ФЛЕШ ВЕСТИ
БУЏЕТ Предлог државниот буџет кој од денеска е на комисиска расправа во Собранието е досега најтешка и предвидува повеќе пари за плати и пензии, социјални трансфери, капитални инвестиции.
Вкупните приходи на Буџетот на Република Северна Македонија за 2023 година се планирани на ниво од 282,1 милијарда денари и се за 14,8 отсто повисоки во однос на 2022 година, додека расходите се планирани на ниво од 324,8 милијарди денари или за 12,6 проценти повисоки во однос на 2022 година.
ДЕЗИНФОРМАЦИИ Дел од македонските медиуми спинуваат со (ре)објавување на стара содржина од 2019 година кога премиерот на Грција, Киријакос Мицотакис, ја најави кампањата на неговата земја насловена како „Голема Македонија“.
СКОПЈЕ 2014 Повторно пропадна камион во фонтаната на плоштадот „Македонија“ во центарот на Скопје. Станува збор за возило на приватна компанија кое како што може да се види и од фотографиите, со предните тркала пропаднало во плочникот во делот каде што се наоѓа партерната фонтана. Возачот е приведен.
ПРАВДА Jавен обвинител од Основното јавно обвинителство Скопје поднесе Обвинителен предлог за кривично дело насилство од член 386 став 3 во врска со став 1 од Кривичниот законик.
ВОЈНА ВО УКРАИНА
Во ракетен напад врз северозападниот сириски град Азаз, кој е под контрола на опозицијата, во вторникот загинаа пет цивили, а уште пет беа ранети, соопшти Ројтерс повикувајќи се на изјава на медицинска сестра во локалната болница и локален активист.
*
Руските напаѓачи пукаа во породилното одделение на болницата во Вилњанск, убивајќи едно новороденче во текот на ноќта во средата, 23 ноември, пренесува Укринформ, повикувајќи се на соопштение на шефот на регионалната државна управа на Запорожје, Олександр Старук.
ЦИВИЛНИ АКТИВНОСТИ
ЦИВИЛ ќе одржи јавен настан на тема „На чија услуга е балансерот“, во четврток (24 ноември), со почеток во 12:30 часот во Прес студиото на организацијата во Бизнис центарот Палома Бјанка.
На панелот ќе се отворат прашања во однос на балансерот при вработување на административни службеници, а во контекст на процентуалната застапеност на етничките заедници во земјава, (зло)употребата на алатката, и можни решенија како што е понатамошното функционирање, но со поинаква регулација, или отстранување на истата.
СЛОБОДНА ЗОНА
Јасно е дека американската амбасадорка Aнџела Агелер има право да реагира на она што се случува во една земја која е НАТО партнер и како држава која е под на постојано набљудување во областа на остварувањето на правата, каде правосудниот систем во најшироката смисла има централно место. Амбасадорката истакна без двоумење дека се вложени силни средства во обука и подготовка за реформи на правосудните фактори во сите домени (би ги исклучиле тука, се разбира адвокатите, на кои им се добри и „старите школи“), но дека тоа не дало соодветни резултати, пишува Љубомир Костовски во анализата „Гласање за обвинители како доказ за хибернација на правната држава“.
Д. Муратов
