Претседателот на Србија, Александар Вучиќ најави дека српската Влада в четврток ќе донесе одлука за испраќање барање до КФОР за обезбедување присуство на српските сили во северниот дел на Косово, јави Танјуг.
Владината седница е в четврток и како што стојат работите, Владата ќе донесе одлука за испраќање писмо до командантот на КФОР, истакна Вучиќ.
Француското Министерство за надворешни работи соопшти дека Франција е многу загрижена поради зголемените тензии на северот на Косово.
Франција е многу загрижена за ситуацијата на северот на Косово и остро го осудува неприфатливиот напад врз мисијата ЕУЛЕКС на Косово и секое насилство на теренот, се наведува во соопштението на Министерството во Париз.
Франција потсетува дека го поддржува европското посредување меѓу Србија и Косово, кое треба да овозможи „придвижување кон глобален договор“ и ги повикува „двете страни да се вратат на дијалогот“.
Барикадите во северниот дел на Косово денеска не беа отстранети и покрај барањата на амбасадите на САД и Велика Британија во Белград и Приштина и повторениот повик на ЕУ двете страни да ги намалат најновите тензии.
За „опасниот пораст на тензиите во Косово“ денеска разговараат и министрите за надворешни работи на Унијата.
Шефот на европската дипломатија, Жозеп Борел, ги повика Белград и Приштина на деескалација на тензиите, истакнувајќи дека барикадите на Косово и нападот врз припадниците на ЕУЛЕКС се неприфатливи и дека двете страни мора да се вратат на дијалогот.
Тензиите се зголемија во текот на викендот во северно Косово, кога непознати лица пукаа врз полицајци и фрлаа шок бомби врз припадниците на ЕУЛЕКС, мировните сили на ЕУ.
Српските демонстранти поставија барикади за блокирање на сообраќајот на двата гранични премини меѓу Косово и Србија, незадоволни од апсењето на поранешен полицаец.
Приштина и Белград меѓусебно се обвинуваат по последната серија немири, кои го принудија Косово да ги одложи локалните избори во општините со мнозинско српско население од 18 декември 2022 на 23 април 2023 година.
