Во Брисел денеска и утре се состануваат министрите за одбрана на земјите членки на НАТО.
Генералниот секретар на НАТО, Јенс Столтенберг пред почетокот на средбата изјави дека министрите за одбрана на НАТО се среќаваат во критично време поврзано со безбедноста.
„Следната недела ја одбележуваме првата година од страшната војна во Украина, и руската инвазија врз оваа држава.
-Не гледаме знаци дека претседателот Путин се подготвува за мир. Она што го гледаме е спротивното, тој се подготвува за уште војна, за нови офанзиви и нови напади.
Така, тоа го прави уште поважно тоа што сојузниците и партнерите на НАТО обезбедуваат поголема поддршка за Украина. Денеска ќе се сретнеме во Контакт групата за Украина предводена од САД и ќе одговориме на итните потреби за зголемена поддршка за Украина.
Не и најмалку важно е потребата да се обезбеди повеќе муниција и, исто така, како да се засили производството и да се зајакне нашата одбранбена индустрија за да можеме да ја обезбедиме потребната муниција за Украина и, исто така, да ги надополниме нашите сопствени резерви.
Ние, исто така, на министерскиот состанок за одбрана ќе договориме нови долгорочни насоки за нашето одбранбено планирање за дополнително зајакнување на нашето одвраќање и одбрана.
Сојузниците, исто така, ќе започнат да разговараат за новото ветување за инвестиции во одбраната. Како и да се осигураме дека ќе продолжиме да инвестираме повеќе во одбраната, изјави Столтенберг.
