Министерката за одбрана, Славјанка Петровска, од самитот на НАТО во Вилнус, во ексклузивно интервју за ЦИВИЛ Медиа, сподели повеќе ставови и информации за извонредно важни прашања за безбедноста и одбраната на нашата земја, за НАТО и за Украина. Издвојуваме пет поенти од ова интервју.
1.
Буџетот на одбраната ќе биде најмалку 2% од БДП
„За да одговориме соодветно на сите ризици со кои се соочуваме и на национално ниво, но и како членки на Алијансата, навистина е потребно да го зголемиме инвестирањето во одбраната. Знаеме дека до 2018 година, тоа го потврдуваат и официјалните бројки на буџетот на одбрана, дека многу малку беше инвестирано, речиси и да не беше инвестирано во одбраната “, изјави Министерката Петровска за ЦИВИЛ Медиа.
Познато е дека зголемувањето на буџетот за обрана на нашата земја започна во 2018 година, откако претходно, за време на режимот на Груевски, нашата одбрана беше опасно запоставена. Денес, ние сме држава што може да се пофали со 1,85% од бруто домашниот производ посветен на одбраната. Тоа значи дека нашата земја нема да се соочи со голем проблем да ги достигне новите правила во НАТО, според кои земјите членки имаат обврска да одвојуваат 2% од бруто домашниот производ за одбрана.
Тука е важно да се запомни дека обврската од 2% од БДП на земјите членки на НАТО не е максималниот износ, туку почетно ниво, односно минимумот што треба да го издвојува секоја НАТО членка.
2.
Поддршката за Украина ќе трае најмалку во наредните десет години, Украина ќе стане членка на НАТО, но приоритет е нејзината победа
Денеска, за прв се одржува Советот меѓу НАТО и Украина. Соработката со Украина се крева на уште повисоко ниво. Украина инсистира да добие датум за прием во НАТО, на што не се согласија САД и поголем дел од членките на Алијансата. Таа во ексклузивното интервју за ЦИВИЛ Медиа открива дека поддршката за Украина ќе трае најмалку десет години.
„Уште поважна е заложбата на сите земји членки на Алијансата, особено САД како предводници, Германија, кои се залагаат за уште поголема поддршка на Украина. Но, таа поддршка да не биде краткотрајна, односно да не ја договараме месец за месец, туку да биде долгорочна поддршка која ќе трае најмалку во наредните десет години. Со таа, пред сè, финансиска поддршка, и политичка и секаков друг вид поддршка, сакаме да ѝ помогнеме на Украина уште повеќе, како што впрочем го правевме во изминатите месеци, да и помогнеме да ја заврши оваа војна што е можно побргу, се разбира, и што е можно побргу да го продолжи својот пат кон интеграција и во НАТО и во ЕУ“, изјави Петровска во ексклузивното интервју за ЦИВИЛ Медиа.
Според Петровска, приоритетите се: победа за Украина и долгогодишна поддршка на земјата што е жртва на руската агресија.
„Неспорно е дека Украина ќе стане земја членка на НАТО алијансата, но, приоритет број еден, за сите нас, и за Република Северна Македонија, како пријател на Украина, меѓутоа, за сите останати сојузници и партнери на НАТО алијансата, приоритет број еден е победата која треба да биде извојувана во Украина“, изјави македонската министерка за одбрана, Петровска, во интервју за ЦИВИЛ Медиа, запрашана за коментар на барањето на Украина да добие датум за прием во НАТО.
3.
Шведска направи уставни промени за да ја надмине блокадата на Турција за влез во НАТО. Тоа треба да биде позитивен пример и за нас!
Шведска направи и уставни измени за да ги задоволи условите на Турција. Тоа е, меѓу другото, причината поради која генсекот на НАТО, Столтенберг, кажа дека овој самит на НАТО е историски, уште пред и да започне.
Од министерката за одбрана, Петровска, побаравме коментар за оваа ситуација во која Турција го деблокира процесот на зачленување на Шведска во НАТО, по уставните измени во Шведска.
„Однесувањето на Турција или деблокирањето, давањето согласност да пристапи Шведска во НАТО, само уште еднаш покажува колку НАТО или сојузниците во Алијансата знаат да ја проценат важноста на моментот“, изјави Петровска.
Министерката за одбрана направи одлична споредба со македонските политички процеси.
„Мислам дека тоа треба да биде позитивен пример за случувањата кај нас, заради тоа што, ако цело време декларативно се залагаме за нешто, тоа треба во одреден момент да го произведеме односно да го преточиме во реални чекори. (…) Единствениот услов, кој во моментов е на маса пред нас, е промената на Уставот со внесувањето на Бугарите како малцинство и продолжување на патот за Република Северна Македонија. Тоа е единственото нешто“, рече Петровска.
4.
„Вагнер“ не е присутен на Балканот во земјите кои се членки на НАТО,
Македонската министерка за одбрана, Славјанка Петровска, со сигурност потврди дека озлогласената платеничка група „Вагнер“ не дејствува во земјите на Балканот што се членки на НАТО, што само уште еднаш ја потврдува вредноста на членството во Алијансата.
„Со сигурност можам да кажам дека ‘Вагнер’ не е присутен на Балканот во земјите кои се членки на НАТО и тоа е уште еден дополнителен мотив и доказ зошто пристапувањето на Северна Македонија во НАТО Алијансата беше толку важно и многу значајно. Сведоци бевме изминатиот период и ќе бидеме во иднина на хибридни дејствувања и на Русија, меѓутоа и на други држави, кои евентуално би ѝ помагале во нејзиното дејствување“, изјави Петровска за ЦИВИЛ Медиа.
5.
Најдобар механизам за борба против дезинформациите и малициозното дејствување е транспарентноста и отчетноста
„Ова ми е важно и ќе го спојам со хибридните дејствувања затоа што секогаш кога имате било каков малициозен обид да се наруши довербата или да се подрие системот, транспарентноста на институциите е особено важна. Затоа што најдобар лек или најдобар механизам за борба или за отпорност кон дезинформациите и таквиот вид на малициозни дејствувања е транспарентноста и отчетноста“, изјави Министерката за одбрана, Славјанка Петровска во ексклузивното интервју за ЦИВИЛ Медиа.
Разговорот го водеше: Џабир Дерала
Камера, монтажа и фотографија: Ариан Мехмети
Транскрипција: Д. Муратов, Б. Јордановска, Д. Варошлија, Д. Тахири
ЦЕЛОТО ИНТЕРВЈУ (текст и видео):
(ВИДЕО) Петровска: Украина ќе стане членка на НАТО, но приоритет е победата на Украина
