ВЕСТ НА ДЕНОТ
ДИК бара поголема активност од општинските изборни комисии
Членовите на Државната изборна комисија (ДИК) Бобан Стојановски и Борис Кондарко бараат општинските изборни комисии (ОИК) максимално да се вклучат во активностите за претстојните Претседателски и Парламентарни избори и како што рекоа, да бидат пооддговорни, поактивни и поажурни.
И на денешната седница на ДИК се одлучуваше по барања за изземање од извршување должност претседател, заменик претседател и член на општинските изборни комисии, а по случаен избор беа одредени нови лица. ДИК одобри и акредитација за изборите на 13 меѓународни набљудувачи од Централната изборна комисија на Косово.
ИЗЈАВА НА ДЕНОТ
По тврдењата на некои македонски политичари во изминатите месеци дека може да има промена Преговарачката рамка за земјава еврокомесарот за проширување и соседство Оливер Вархеји во интервју за БГНЕС тврди дека Преговарачката рамка нема да се смени и дека тој не смета оти земјите-членки на Европската Унија сакаат да ги преразгледуваат условите што ги има Северна Македонија.
ИНТЕРВЈУ
„Обединетите нации сè уште претставуваат најдобра платформа за обезбедување на светскиот мир и соработка со сите нејзини недостаоци кои се јавуваат во текот на функционирањето. И еден од клучните чекори кои Македонија мораше да го направи а тоа е членството во ООН. И го направивме. Пред 31 година ние станавме земја членка на ОН, под времена референца со оглед на отвореното прашање кое уште од самиот почеток го имавме со Грција и кое прашање остана незатворено уште 27 години. Меѓутоа тогаш благодарение на храброста и одлучноста на претсеадтелот Киро Глигоров и тогашното водство Македонија стана земја членка на ОН а знаевме колку тоа е значајно за греадење на една независна држава“ рече претседателот на СДСМ Димитар Ковачевски во интервју за Фронтлајн.
ФЛЕШ ВЕСТИ
ОДБЕЛЕЖУВАЊЕ Меѓународниот ден на Ромите, посветен на најголемото етничко малцинство во Европа, ги слави различностите, ромската култура и уметност, нивниот јазик и придонес во европската историја и општество, наведуваат потпретседателката на Европската комисија за вредности и транспарентност Вера Јоурова и еврокомесарите за еднаквост и за соседска политика и проширување, Хелена Дали и Оливер Вархеји во заедничката изјава по повод Меѓународниот ден на Ромите – 8 април.
ЗДРАВСТВО Веднаш по формирањето на новата влада да се потпише анексот на Колективниот договор, порачаа денеска здравствените работници од протестот пред Министерството за здравство.
ИНТЕГРАЦИИ Маричиќ: Македонскиот јазик и културата „со посебна важност во процесот на евроинтеграција“.
ТУРЦИЈА Најмалку 28 новинари и медиумски работници се или во истражен притвор или на издржување казна во затворите во Турција, истовремено, Ердоган држи над 200 политички затвореници, претежно Курди, притворени надвор од досудената казна, а бројката се зголемува секојдневно.
ИЗБОРНА ХРОНИКА: Викенд кампања – Објава на програми; тежок старт со минус шест бодови; раскинување на договорот со Бугарија; борба против руско влијание; опожарен билборд на кандидат
ВОЈНА ВО УКРАИНА
Британскиот министер за надворешни работи Дејвид Камерон и неговиот француски колега Стефан Сежурне повикаа на јакнење на поддршката за Украина.
*
Портпаролот на кинеското Министерство за надворешни работи Ванг Венбин ја нарече руската агресија врз Украина „украинска криза“ и рече дека „не може да има победници и губитници“. Терминот „украинска криза“ е неприфатлив за карактеризирање на руско-украинската војна. Украина не е ниту причина ниту извор на кризни феномени во меѓународните односи.
КОНФЛИКТИ
Со неселективниот напад на 7 октомври минатата година Хамас целосно се дисквалификува себеси и оваа криминална група не може да го претставува палестинскиот народ, порача високиот претставник на ЕУ за надворешна политика и безбедност Жосеп Борел, по повод шест месеци од нападот на исламистичкото движење врз Израел.
*
Десетици илјади Израелци викендов демонстрираа низ целата земја против владата на Бенјамин Нетанјаху, барајќи посериозни напори за ослободување на заложниците кои Хамас ги држи шест месеци.
АЛ-ПРЕС
Во Косово почна пописот на населението, процес кој ќе трае месец и половина. Последниот попис на населението во Косово беше спроведен во 2011 година, кога земјата имаше околу 1,8 милиони жители. Прашалникот за регистрација за првпат ја вклучува и документацијата за воените штети во семејните стопанства. На овој попис се очекува и бојкот, бидејќи најголемата партија на Србите на Косово, Српска Листа, ги повика Србите да го бојкотираат процесот на попис на населението организиран од институциите на Косово, пренесуваат косовските медиуми.
Европската унија планира наскоро да ја организира следната средба меѓу главните преговарачи на Косово и Србија за да се најде решение за прашањето за динарот врз основа на предлог на посредникот Мирослав Лајчак.
Портпаролот на ЕУ, Петар Стано, во изјава за медиуми рече дека страните мора што поскоро да најдат решение за да го отворат патот за нормализација на односите.
Ова се дел од темите од денешниот редакциски избор на ЦИВИЛ Медиа, од албанските медиуми во регионот.
ИНИЦИЈАТИВА
Новинарот Зоран Иванов, со пораката за важноста на демократското право на глас: Демократијата е слобода, гласањето е слобода. Гласањето е слободен избор, секој глас е наш глас, наша сопственост!
ФОТО ВЕСТ
Новинарот Љупчо Златев на неговиот Фејсбук профил објави фотографија дека „има разлика меѓу новинар и гангстер“, алудирајќи на апсењето на новинарот од „Портал Х“ Фуркан Салиу со образложение дека нападнал полицаец на фудбалски натпревар, а во неговото возило е пронајден пиштол, додека пак Салиу негираше дека нападнал полицаец, а за пиштолот рече дека поседува дозвола.
Само да потсетиме дека едно време и Златев се „фалеше со неговиот пиштол Глок“ (за кој сега вели дека му бил на дијаболи).
СЛОБОДНА ЗОНА
Бруталното апсење на новинарот Фуркан Салиу за време на фудбалски натпревар го покажа вистинското лице на раководната структура на МВР во моментов. И не само тоа. Тука не завршува тревожната сторија.
Се дознава дека тој бил малтретиран, а веројатно и тепан и во полициска станица. Овој тежок инцидент претставува брутално кршење на човековите права.
Насилството беше очигледно од видео снимките на социјалните мрежи. Тоа што е помалку очигледно, а сосема извесно, е инструментализирање на полицијата и активирање на пропагандната машинерија во ист такт: Да се посее страв и да се предизвикаат поделби и тензии, а по потреба и насилство.
Што е следно?
Пуч!?, пишува Џабир Дерала во колумната „ПОЛИЦИСКА БРУТАЛНОСТ НА МВРО: Зошто беа поставени нови началници во полицијата?“.
Д. Муратов
