„Ми претставува особена чест и задоволство да ви го честитам стапувањето на должноста 45-ти претседател на САД и да ви упатам најискрени желби за успешно извршување на високата и одговорна функција. Воедно, преземањето на должноста ви го честитам и во името на сите граѓани на Република Македонија“, се вели во честитката на претседателот на Македонија, Ѓорге Иванов, до Доналд Трамп.
„Високо ги почитуваме вашите ставови и надворешно-политички цели. Глобалниот поредок има потреба од јакнење на пријателството меѓу државите, без наметнување на интересите и со почитување на правото на избор на нациите во светот. Сакам да знаете дека во Република Македонија и во мене, имате искрен пријател и поддржувач“, пишува Иванов
И долгогодишните партнери во власта, ДУИ и ВМРО-ДПМНЕ испратија честитики на новоизбраниот, американски претседател.
ДУИ посака „Бог да ги благослови американскиот народ и албанско-американското пријателство“.
„Посакувајќи добро здравје и успех во новата задача на претседателот Трамп, остануваме уверени дека САД ќе продолжат да бидат стратешки партнер на Македонија, Албанците и Балканот во нашиот незапирлив евроатлантски пат“, се вели во честитката потпишана од лидерот на ДУИ, Али Ахмети, во која се искажува и почитување на работата на досегашната администрација на Барак Обама и придонесот за Македонија и за Албанците воопшто.
И ВМРО-ДПМНЕ му ја честита инагурацијата и стапувањето на функција на новиот претседател на САД. Влатко Ѓорчев во име на партија посака „стратешкото сојузништво меѓу Република Македонија и САД да продолжи да се развива и да се интензивира“
„Ви ја честитам инаугурацијата за претседател на САД, големиот стратешки пријател на нашата држава, Република Македонија, во име на СДСМ и во мое име“, се вели во честитката на Зоран Заев.
„За граѓаните на Македонија од огромно значење е придонесот на САД во развојот на демократските процеси и почитувањето на човековите слободи и права во земјава. Исто така, од големо значење е поддршката на САД за безбедноста на Република Македонија и целиот регион.Иднината на Македонија како држава е во НАТО и Европската унија и се надевам дека САД ќе продолжи со политиките на поддршка на евро-атлантските интеграции. Се заблагодаруваме на континуираната успешна соработка што во тој дух ја има нашата земја со САД и се надеваме дека така ќе продолжи и во иднина“, напишал Заев.
