Непознати лица испишале текст на албански јазик со навреди и го исшараа монументот кој се наоѓа на кејот во Гостивар. Претходно на срцето беше исцртано македонското знаме и делови од словенската азбука, како чин за одбележување на 24 Мај – денот на писменоста, објави Фронтлајн.
Гостиварци од утрово по социјалните мрежи го осудуваат овој чин.
– Ова не е постапка со која се отсликува соживотот на гостиварчани, зошто сите ние – Македонци, Албанци, Турци, Роми. Сме растеле заедно, сме се почитувале и сме ги негувале различностите. Ова може да го направи само оној што не израснал со овие вредности, напиша Ема Мешковска, советник во општинскиот совет и еден од иницијаторите да се одбележи денот на сесловенските просветители Св. Кирил и Методиј.
Во полиција настанот не е пријавен, а доколку биде, како што наведоа од СВР Тетово, ќе бидат превземени соодветни мерки.
Врз сегмент од бетонскиот монумент во понеделникот, средношколци со дозвола на локалната самоуправа го обои со мотиви на македонското знаме и беа испишани букви од глаголицата и кирилицата.
На Светскиот ден за културна различност за дијалог и развој (21 мај), ЦИВИЛ упати гласен и недвосмислен повик до сите чинители во земјата, регионот и светот, конечно да покажат вистинска волја да обезбедат сигурна иднина, стабилност и праведен мир на национално, регионално и меѓународно ниво.
„Почитувањето на различностите е основен услов да се изгради општество на рамноправни граѓанки и граѓани, и рамноправни заедници по сите основи. Општество во кое не се почитуваат различностите е соочено со силни предизвици и ризици од тензии и насилство.
Институциите, медиумите и граѓанското општество имаат обврска и одговорност да го промовираат почитувањето на различностите на доследен и искрен начин, како преку легислативата, политиките и практиките, така и преку проактивно општествено и медиумско делување“, велат од ЦИВИЛ.
ЦИВИЛ го осудува вандализирањето и говорот на омраза во Гостивар.
Д.М.
