САД го засилија притисокот за прекин на огнот во Газа со повик за гласање во Советот за безбедност на ОН за примирје, и го испраќаат највисокиот дипломат на Вашингтон во регионот погоден од осуммесечна војна.
На регионалната турнеја на државниот секретар Антони Блинкен и претходеше натамошно бомбардирање на Газа од страна на израелските сили, при што очевидци пријавија напади во текот на ноќта во центарот на појасот и пукање од хеликоптер врз разурнатиот град Газа.
Во меѓувреме, израелскиот премиер Бенјамин Нетанјаху се соочи со несогласување во државата, при што членот на воениот кабинет Бени Ганц поднесе оставка во неделата поради раководењето со војната од страна на премиерот, јавува Ен – Би – Си.
Вашингтон се обиде да го приближи прекинот на огнот со поднесување нацрт-резолуција во ОН, повикувајќи на „итен прекин на огнот со ослободување на заложниците“ меѓу Израел и милитантната група Хамас.
САД беа широко критикувани за блокирање на неколку претходни нацрт-резолуции на ОН кои повикуваат на прекин на борбите.
Новиот притисок за договор од страна на претседателот Џо Бајден на 31 мај, одвоен од ОН, досега не даде опипливи резултати, додека дополнителни сомнежи беа фрлени за примирје од нападот на израелските специјални сили за ослободување на заложниците во кој загинаа голем број Палестинци во саботата.
Израелската војска соопшти дека тимот за извлекување и четворицата спасени заробеници биле под силен оган од милитантите, кои убиле еден полицаец, додека израелските сили започнале напади кои ги претвориле околните згради во урнатини.
Министерството за здравство на територијата управувана од Хамас соопшти дека 274 луѓе биле убиени и 698 ранети, во, како што го нарече „масакрот во Нусеират“. Меѓу нив има најмалку 64 деца, 57 жени и 37 постари лица, соопшти Министерството.
Се зголемува притисокот поради неуспехот на Нетанјаху да ги врати преостанатите заложници, а заминувањето на Ганц од воениот кабинет означи голем политички удар.Одлуката на Ганц, која нема да ја урне десничарската влада, доаѓа откако тој му постави ултиматум на Нетанјаху да го претстави повоениот план за Газа до 8 јуни.
Одговарајќи на првиот голем политички удар за него за време на конфликтот, Нетанјаху му рече на Ганц дека „не е време да се откаже од битката“.
Четворицата ослободени заложници се меѓу само седумте што израелските сили успеаја да ги спасат живи откако палестинските милитанти киднапираа 251 во нивниот напад на 7 октомври.
Десетици беа разменети во ноемвриското примирје за палестинските затвореници. По операцијата за спасување во саботата, 116 заложници остануваат во Газа, иако армијата соопшти дека 41 од нив се мртви.
Највисокиот израелски дипломат ги отфрли обвинувањата „за воени злосторства“ во операцијата.
„Ќе продолжиме да дејствуваме со решителност и сила, во согласност со нашето право на самоодбрана, додека не бидат ослободени сите заложници и Хамас не биде поразен“, рече министерот за надворешни работи Израел Кац.
Шефот за надворешна политика на Европската унија, Жозеп Борел, го поздрави ослободувањето на заложниците и рече дека извештаите „за уште еден масакр на цивили се ужасни… крвопролевањето мора веднаш да прекине“.
Блинкен треба да ги посети Египет, Израел, Јордан и Катар за време на неговата осма регионална турнеја по избувнувањето на конфликтот.
„Единственото нешто што стои на патот за постигнување на овој прекин на огнот е Хамас. Време е тие да го прифатат договорот“, рече тој во саботата.
Хамас инсистираше на трајно примирје и целосно повлекување на Израел од сите делови на Газа – барања што Израел категорично ги отфрли.
Најкрвавата војна досега во Газа избувна по нападот на 7 октомври врз јужен Израел кој резултираше со смрт на 1.194 луѓе, главно цивили.
Во израелската одмаздничка воена офанзива загинаа најмалку 37.084 луѓе во Газа, исто така главно цивили, според Министерството за здравство на палестинската територија.
Конфликтот предизвика широко распространето уништување во Газа и раселени повеќето од нејзините 2,4 милиони жители, од кои многумина се на работ на глад.
Помошта пристигнува само спорадично со камиони, авиони и преку море.
Американската војска соопшти дека привременото пристаниште кое претрпе оштетувања од невремето кон крајот на минатиот месец, е обновено и искористено во саботата за испорака на околу 492 тони „многу потребна хуманитарна помош“.
Извор: МИА
