Претседателот на најголемата стопанска комора во земјава, Бранко Азески со писмо упатено до премиерот Христијан Мицкоски бара да се избришат делови од Законот за нефер трговски практики со кој се ограничува рабатот што добавувачот му го одобрува на купувачот, како и да се прецизираат условите под кои купувачот може да ги врати кај добавувачот непродадените производи.
Во писмото на четири страници од Азески до Мицкоски до кое дојде Телма стои дека во ЕУ субјектите на пазарот имаат повеќе простор да се адаптираат на новините.
Како што пишува Азески во писмото, спорен е периодот на прилагодување на новото законско решение. Во писмото стои дека во ЕУ субјектите на пазарот имаат повеќе простор да се адаптираат на новините. Проблем за Азески е и тоа што некои измени треба да се случат во период кога не е завршена календарската година.
„Праксата на другите пазари во Европската Унија укажува на многу подолг период за усогласување со законите со кои се забрануваат одредени трговски практики. Во Република Северна Македонија преоден период не е оставен, освен за добавувачите и за купувачите кои склучувале договори за снабдување, за кои имаат обврска да ги усогласат со овој закон во рок од шест месеци од денот на неговото влегување во сила, а тоа е пред истекот на септември 2024 година“, пишува Азески.
Исто така, во писмото се сугерира дека треба да се зголеми рокот во кој купувачот го известува добавувачот дека ја намалува нарачката на одреден производ.
„Претставниците на добавувачите и на купувачите изразија потреба од дополнително прецизирање и појаснување на одредени одредби од Законот. Предлагаме да ја разгледате можноста за дополнително продолжување на рокот на усогласување на работењето со Законот, со цел разјаснување на сите дилеми и поголема правна сигурност за субјектите кои се засегнати од него“, стои во писмото.
Законот за забрана на нефер трговски практики кој се донесе во март имаше за цел да го сопре дивеењето на цените, пред се на прехранбените производи. Беше составена листа со над 2.500 производи чии маржи не треба да бидат поголеми од 10 отсто.
Веднаш по негово донесување, од Стопанската комора бараа во овој документ да бидат производи кои се со ДДВ од 5 отсто. Сега добавувачите и купувачите имаат рок уште неколку дена да ги усогласат договорите. Премиерот Мицкоски ќе чека да заврши месецов и да види дали ја исполниле обврската, но по дописот кој е упатен дирекно до него останува да се види, дали тој ќе ги прифати барањата од бизнисот и дали законот ќе се менува но и дали ќе се пролонгира неговата примена.
Во услови кога Владата не планира замрзнување на цените кои секојдневно раснат, асе поизвесно е и дека нема да има зголемување на минималната плата, куповната моќ на граѓаните опаѓа со што се загрозува животниот стандард на населението.
М. Д.
