Кршење на изборниот молк, говор на омраза, социјални проблеми, неажурност на градските власти…, се меѓу темите на авторите во вториот циклус на проектот „Граѓански објектив“, на кои на денешната церемонија им беа доделени наградите за граѓанско новинарство.
Автори на првонаградената видео-сторија со наслов „Додека се живи пензионерите, ќе живее и Велес!“ се Росица Стојкова од Лозово и Ненад Јовановиќ од Кавадарци.
„ЦИВИЛ е моја драга организација, затоа што се залага за цивилизациски вредности. Наградата е симболична, но сепак е валоризација на трудот“, изјави Јовановиќ, при примањето на наградата.
Тричлената жири-комисија на ЦИВИЛ – Центар за слобода, Билјана Јордановска, Маја Ивановска и Ермин Климента, втората награда ја додели на авторите Лорета Петровска, Николетка Панева и Влатко Цеков од Свети Николе, за видео-интервјуто со наслов Ако ние, граѓаните, не си ги решиме проблемите, политичарите нема да ни ги решат…“
„Овој прилог е поврда дека субвенциите, не им се доволни на земјоделците, не им помагаат во нивната секојдневна борба за егзистенција“, рече Лорета Петковска.
Третата награда ја доби сторијата „Говор на омраза на ‘прославата’ на ВМРО–ДПМНЕ во Ресен! чиј автор е анонимен граѓански новинар.
„Оваа награда одлучивме да ја доделиме, зашто како Комисија сме вџашени од навредите и заканите по улиците, кои се практицираа во ‘славеничката’ атмосфера по изборите“, рече Климента, еден од членовите на жири-комисија.
Ана Малцева со сторијата „Кршење на изборниот молк пред домот на АРМ“ и Вулнет Мехмути со клипот „Скопје 2014“: Рискантна прошетка по плоштадот „Македонија“ се добитници на двете четврти награди.
Оценувачката комисија во периодот на траење на проектот, додели 55 награди во вредносни ваучери, меѓу другото и за да ги мотивира граѓанските новинари, технички да се доопремат и да користат „смарт“ телефони, фотоапарати или камери и да ги регистрираат општествените аномалии.
„Вашите прилози ја илустрираа многу тешката состојба во Македонија, особено за луѓето на кои им треба социјална заштита и други државни сервиси. Токму тие луѓе се цел на притисоци и закани, тие се злоупотребени и се користат како машини за гласање. Затоа и овие ваши трудови се многу значајни, за да дојдеме до фактите и реалноста. ЦИВИЛ говори со фактите на реалноста, но како ќе говориме, ако ве нема вас“, поентираше претседателот на ЦИВИЛ, Џабир Дерала
Следниот викенд на 18 и 19 февруари, во Струмица, во рамките на проектот „Граѓански објектив“ ќе се одржи третиот дводневен семинар за едукација на граѓански новинари од новиот циклус.
Моника Талеска
