Денеска, 15-ти февруари во 20 часот во Младинскиот културен центар (МКЦ), ќе се одржи промоција на зборникот „100 илјади поети за промена“, како дел од манифестацијата која по втор пат се одржува во Скопје, а по шести пат во Македонија. На настанот со поетско читање ќе се претстават и дел од поетите кои со песни се застапени во зборникот.
Од околу 220 автори кои аплицираа на конкурсот, по селекцијата, во зборникот се застапени 60 автори.
„100 илјади поети за промена“ е манифестација која е збир на стотици индивидуални настани што се случуваат истовремено, секоја година, во многу градови ширум светот.
Темите кои се најчеста инспирација за авторите и поетите кои се дел од ова движење, обработуваат проблеми поврзани со општествениот и социјалниот живот, со мирот, со заштитата на природната околина и на планетата Земја, како проблемите со глобалното затоплување и со ранливите општествени групи.
„Со оваа промоција, особен акцент ќе се стави на одбележувањето на 15-ти февруари – Меѓународниот ден на децата болни од рак. На оваа тема во Македонија воопшто не се разговара, ние го избегнуваме овој проблем, а има голем број деца кои се заболени од рак, а не добиваат никаков третман и помош од Министерството за здравство“, вели Митко Гогов, организатор на настанот во разговор за ЦИВИЛ Медиа.
„Оваа година, во овој зборник објавив песна која е инспирирана од војната во Унгарија. Тоа е поврзано и со нападот кој подоцна се случи кај нас, во Куманово. Преку тие настани ги коментирам војните во светот, дека , сé уште се случуваат братоубиствени војни. Едни со други се убиваме иако сме исти, без разлика на која нација, на која религија припаѓаме“, рече за ЦИВИЛ Медиа Ѓоко Здравевски еден од авторите кои учествуваат во овој зборник.
Идејата е да се направат поетски рецитали и мултимедијални настапи, што само по себе подразбира најразлично претставување на авторска поезија на поети од сите генерации. Самиот настан има мото „Поетите за промена“ и поетите ќе имаат можност да направат барем минимална промена на свеста на општеството во кое живееме. Ваков тип на настани се случуваат насекаде низ Балканот, во Србија, Хрватска, Бугарија и Македонија.
