ЦИВИЛ повикува на свесност и совесност кај граѓанките и граѓаните во пресрет на новогодишните празници – БЕЗБЕДНОСТ пред сѐ – петардите и славеничкото пукање се опасни по здравјето и животот.
Децата се најчести жртви на повреди, трауми и несакани трагедии од употребата на распрскувачки материјали и несовесна употреба на оружје. Кога несовесни лица го злоупотребуваат оружјето за славеничко пукање, одговорните родители треба да им кажат три едноставни безбедносни правила на своите деца:
- да се оддалечат од местото на славеничко пукање
- да не допираат оружје или експлозиви и
- да пријават незаконска употреба на оружјето.
Но, и да им објаснат дека тие правила важат и за возрасните, дури и на најголемите професионалци со дозвола за употреба на оружје и распрскувачки материјали може да им се случи да погрешат.
ПРОСЛАВЕТЕ БЕЗБЕДНО!
Славеничкото пукање е забрането со закон и е крајно опасно по животот. Бројни се примерите на трагични завршетоци на прослави и веселби кога заскитан куршум убил или повредил случаен минувач или учесник на прославата.
Распрскувачките материјали и петардите се опасни по здравјето и животот. Во еден прирачник на ЦИВИЛ за едукација на деца и млади за безбедно однесување се вели:
„Петардите и распрскувачките материјали, како и оружјето се опасни и често предизвикуваат трагедии дури и во редовите на професионалци на кои во описот на работното место им е ракување со експлозиви и оружје.“
ЦИВИЛ потсетува дека домашните миленици се посебно сензибилни на звуците од распрскувачките материјали и петардите. Особено кучињата, кои често се обидуваат да побегнат кога се исплашени од петардите, може да се повредат, а често и да има фатални последици. Многу од овие животни може да завршат неколку километри од дома, бегајќи од страв.
ЦИВИЛ се придружува и кон повикот на МВР да не се употребуваат петарди и други пиротехнички средства неовластено и ги повикува граѓанките и граѓаните да го пријават несовесното и противзаконско однесување.
#СлаветеБезбедно
ЦИВИЛ
