Последната 62-ра седница на Советот на Oпштина Битола на чиј дневен ред беше планот за нови вработувања во јавните претпријатија, предизвика жестока расправа меѓу советниците од владејачката партија и од опозицијата.
ЦИВИЛ Медиа разговараше со советничката од редовите на ВМРО-Народна партија, Габриела Илиевска, за забелешките кои беа посочени за време на вчерашната расправа.
„Со новиот Закон за вработените во јавниот сектор од 2014-та година и со промените во 2016-та, јавните претпријатија мора да поднесат план за вработување за претстојната година, или нема да можат да вработуваат, и тоа не е спорно, Проблемот е во калкулаторот за националистите кој се користи при дефинирање на работните места, а кој се базира на Пописот од 2002 година. Пример, за вработување на припадниците на влашката националност. Доколку при распределба на новите работните места се користат податоците од последниот попис, по таа логика, Влав во Битола никогаш не треба да се вработи“, објаснува Илиевска, која потсети дека „во изминатиот период, директори на јавни претпријатија се бираа од домашен притвор“.
Проблемот со етничкото квалифицирање за одделни работни места, го потенцираше и советничката од СДСМ, Наташа Петровска.
„Дали на овој начин создаваме услови, квалитетот на кандидатите да е последно мерило за вработување? Ова е проблем кој треба да се решава во законодавниот дом, но ние како советници, можеме и имаме одговорност да покренеме дискусија. Според мене, граѓанинот е пред сé. А тоа значи, при вработување – прво квалитет, а потоа, запазување на националната припадност“, вели Петровска, според која, проблематичен е и бројот на вработувања -76, колку што немало во последните 10 години во јавните претпријатија во градот! Според неа, постои сомнеж дека причина за тоа се претстојните локални избори.
Советниците од ВМРО-ДПМНЕ со различен став по ова прашање.
„Јавните претпријатија го планираат идеалниот број на вработувања кои, според нив, се потребни за извршување на работата. Затоа е поголем бројот на вработени кои се дел од планот на претпријатијата, без разлика дали ќе се реализираат или не, зависно од тоа дали има финансиски средства за тие работни места. Но, доколку овој план не се достави, јавните претпријатија нема да имаат можност да објавуваат нови работи места“, објаснува советничката од ВМРО–ДПМНЕ, Елена Трајчевска.
Според планот на јавните претпријатија, во 2017-та година треба да се вработат 31 лице во ЈП „Нискоградба“, 22 – во ЈП „Комуналец“ , 8 лица во ЈП „Водовод и канализација“ и 6 во ЈП „Пазари“.
Марија Теговска
