Израелските војници убиле 15 и раниле повеќе од 80 луѓе во јужен Либан, соопшти либанското Министерство за здравство, бидејќи израелската војска останала во делови од земјата по истекот на рокот за нивно повлекување и отстранувањето на Хезболах од областа.
Во неделата наутро, илјадници жители се вратија во градовите и селата долж границата, и покрај предупредувањата на либанската и израелската армија и ОН дека регионот и понатаму е небезбеден, објави Би-би-си, пренесува ЦИВИЛ Медиа.
Според либанското Министерство за здравство, израелските сили нападнале додека луѓетосе обидувале да влезат на локации кои сè уште биле под окупација. Либанската армија соопшти дека еден нејзин војник е убиен, а друг ранет од израелски оган.
Израел соопшти дека 60-дневниот договор за прекин на огнот со Хезболах не бил целосно имплементиран и остана нејасно колку од неговите војници останале во Либан или колку долго ќе останат, додека ИДФ објави дека испукала „предупредувачки истрели во повеќе области“ на јужен Либан, без да прецизира дали биле погодени луѓе, и дека уапсила неколку луѓе за кои тврди дека претставуваат „непосредна закана“.
Договорот за прекин на огнот, кој беше постигнат со посредство на САД и Франција и стави крај на 14-месечниот конфликт, предвидува повлекување на израелските трупи и отстранување на борците и оружјето на Хезболах од јужен Либан. Во исто време, се очекуваше илјадници либански војници да бидат распоредени во областа каде што, со децении, Хезболах беше доминантна сила.
Подготви: Д. Мишев
