Претседателката на Европска комисија, Урсула фон дер Лајен, како што пренесува МИА, денеска изјави дека за ЕУ трансатлантската соработка е клучна за просперитет, безбедност и мир, но оти е подготвена да ги брани своите интереси ако САД почне да се однесува нефер.
Таа на заедничката прес-конференција со премиерот на Полска, Доналд Туск во Гдањск истакна дека ЕУ сака трансатлантското партнерство да биде посилно.
– Не само поради историските врски туку затоа што е паметен пристап. Затоа се ангажираме и промовираме прагматична програма. Во исто време, ние сме подготвени, доколку е потребно, да ги заштитиме нашите интереси, наведе Фон дер Лајен.
Таа потсети дека соработката помеѓу ЕУ и САД е од корист за бизнисите од двете страни на Атлантскиот Океан и дека Брисел може да реагира на царините објавени од новата американска администрација на Трамп.
– Клучно е да се вклучиме во претприемништвото заедно. Сметаме дека соработката меѓу компаниите треба да се зајакне бидејќи царините значат повисоки деловни трошоци, им штетат на работниците, им штетат на потрошувачите бидејќи цените растат и тоа ја нарушува економијата. Тие се скапо за двете страни, истакна Фон дер Лајен.
Таа додаде дека е уверена оти ќе се изнајде заедничко решение.
– Во исто време, ЕУ е подготвена ако се појават неправедни предлози. Подготвени сме да реагираме одлучно. Ќе бидеме многу одлучни во нашите принципи, посочи Фон дер Лајен.
