„Долго дебатиравме каков формат да ѝ дадеме на оваа средба, дебата, тркалезна маса, панел-дискусија… И, на крајот, заклучивме дека е можеби најдобро, тоа да биде еснафски муабет, меѓу луѓе кои имаат што да кажат и чиј збор тежи во новинарството, во професијата која според некои е најубава во светот, а во Македонија последниве две децении е долносана до најниско можно дереџе“, рече уредникот на ЦИВИЛ Медиа, Синиша Станковиќ, модератор на панел-дискусијата „Меѓу чеканот и наковалната: Медиумите и новинарството во изборниот процес“, што се одржа минатата недела во организација на ЦИВИЛ – Центар за слобода,
„Поканивме 16-17 колеги, од кои најголем дел најпрвин прифатија да дојдат на муабетот, но денес е петок, новинарите имаат дневни обврски, подготвуваат емисии, или се на терен, се обидуваат да си ја заработат платата, мислам на оние медиуми во кои сé уште им се исплаќаат и плати на новинарите, а од друга страна, и политичката ситуација е таква-каква што е, со сé она што ни се случува последниве два месеца, со чекањето на чадот од Речица… Но, едно од образложенијата за недоаѓање денеска, беше од колешка која ми рече дека, иако за новинарството и медиумите треба и мора да се зборува, веќе ѝ е смачено и згадено од сé – ја вергламе истата тема, а ништо не се менува… И тоа мора сите да нé загрижи, оти сé станува бесмислено…“, рече Станковиќ.
„Каневме и уредници во и на телевизиски куќи, и на печатени медиуми, дописници на странски медиуми, новинари со долги кариери…, и на крајот, наши гости денеска се петмина еминентни новинари. Мислам дека на овие шест столчиња денес седат релевантни луѓе, со кариери во новинарството, со големо искуство од некои 160-170 години стаж во разни медиуми…“, рече Станковиќ претставувајќи ги панелистите: Гордана Дувњак (Утрински весник), Љубиша Николовски (ТВ Нова), Биљана Спасеска Георгиевска (ТВ 21), Бранко Геровски (Слободен печат, Плусинфо), Назим Рашиди (ТВ Алсат – М).
„27 години новинарите во Македонија се жалат, на сопствениците, на уредничките делови од екипите, на немањето доволно ресурси, што се покренуваат медиуми без претходно осмислен буџет, на тоа што еснафската организација не ги заштитува доволно, се жалат и на падот на стандардите, се жалат на нивото на критерумите и на сé она што ни е долносано и за што имаме оценки од релевантни меѓународни организации, но некако најмалку, или јас имам таков впечаток што можеби е и погрешен, зборуваме самите за себе! Односно, колку и што можат денес, со оглед на состојбата со слободата на медиумите и на јавното изразување, новинарите во Македонија да направат, за оној омеѓен простор што секојдневно им се стеснува, да го прошират и да го вратат барем на нивото од 90-тите години од минатиот век“, рече Станковиќ.
Камера: Атанас Петровски
Монтажа: Ермин Климента
