Продолжува црната кампања на самопрогласените бранители и заложници за „заедничка Македонија“, а ниту една институција сé уште не реагира по повод ниеден од овие случаи на ширење омраза и на повици на насилство. Низ Скопје и на социјалните мрежи се појавија летоци/плакати – „потерници“ за пратенците од редовите на СДСМ, Павле Богоевски, Стево Пендаровски и Ивана Туфегџиќ.
Летоците со фотографии и текст во кој се вели „Се бара за предавство“ се појавија на неколку локации низ Скопје.
Личностите кои се објавени на овие „потерници“ се обвинети за: прифаќање на двојазичност, федерализација, обврска за учество на Албанците во спорот за името, промена на банкноти, химна, знаме, грб, полициски и воени униформи како и промена на уставното име на Република Македонија.
„Јас сум тука, Сеад Кочан го нема. Нема потреба од потерници и измислици, вашите лаги се пробиени и разобличени. Дел од ова што сте го навеле, веќе постои, дел никогаш нема да се случи. Дополнително, мека форма на конфедерација? Сериозно? Знаете воопшто, што значи тоа и како се изведува? Штедете ги парите на партијата, не ги арчете џабе, ќе им требаат за адвокати, кауции, судски трошоци и слично, зашто ќе одговараат за секое кривично дело“, реагираше Туфегџиќ на својот Фејсбук профил.
„Утрово во Дебар Маало и делови од Центар беа излепени овие најнови активистички достигнувања на чистото движење за заедничка Македонија. П.С. Поздрав од ‘Ролексот’. Толку и ви вреди ‘активизмот’. Колку обичен кромид, кој очајно сакате да го претставите како Ролекс“, напиша Богоевски на Фејсбук.
Покрај ваквите „потерници“, повторно се јави и Миленко Неделковски, кој овој пат објави фотографија од споменикот на Ќосето со наслов „Пролет 2017: Tour de Macédoine“, врз која ги додал адресите на живеење на неколку јавни личности кои жестоко се борат против режимот на ВМРО-ДПМНЕ. На листата на Неделковски се најдоа Сашо Орданоски, Мирјана Најчевска, Бранко Геровски, Бранко Тричковски, Владимир Милчин, Љубомир Фрчкоски и Ацо Кабранов.
ЦИВИЛ Медиа побара изјава од неколкумина од нив.
Професорот и аналитичар Сашо Орданоски одби да одговори на нашето прашање, и само кусо искоментира: „Кога ќе дојде време, Неделковски ќе одговара за своите постапки“!
„Во демократските држави вообичаено има органи кои реагираат на ваков вид на активности, има места на кои може да се пријави дека станува збор за видно вознемирување, за дури, можеби, и загрозување на животот и слично. И, евентуално, има процедури во кои што може човек, било со пријава до јавниот обвинител, било по приватна тужба, да гони една ваква активност. Кај нас, не постои таква можност. Имено, веќе во неколку наврати е направен обид да се гонат луѓето како Миленко Неделковски, за истапи од овој или од полош вид, меѓутоа безуспешно. Најверојатно ќе мораме да причекаме промена на сите судии и сите јавни обвинители и на дел од полицијата, за да можеме да се заштитиме од ваков вид на атаци“, ни изјави Мирјана Најчевска.
Маја Ивановска
