Европската Унија секогаш ја поддржувала и ќе продолжи да ја поддржува Повелбата на ОН и нејзините фундаментални принципи: суверенитет, еднаквост меѓу земјите, територијален интегритет, политичка независност и самоопределување, кои не се апстрактни идеали, туку темел на меѓународните мир и безбедност, порача високата претставничка на ЕУ за надворешни работи и безбедносна политика Каја Калас во изјава по повод Меѓународниот ден на мултилатерализмот и дипломатијата за мир – 24 април.
– Историјата не научи – често по болна цена – дека изолационизмот и унилатерализмот раѓаат нестабилност. Пред 80 години, како последица на екстремното уништување предизвикано од Втората светска војна, Обединетите нации се родени за да не спречат да ги повториме грешките од минатото. Со Повелбата на ОН, беше создадена нова ера на меѓународна соработка и поредок заснован на правила, заснован на вредностите и принципите на правдата и меѓународното право, наведе Калас.
Сепак, според неа, додека ја славиме оваа пресвртница, се соочуваме со сериозни предизвици за меѓународниот поредок предизвикани од „неиспровоцираната и незаконска агресивна војна на Русија против Украина, која е директен напад врз мирот, безбедноста и самите принципи врз кои се основани Обединетите нации“.
– Оваа војна покажува дека владеењето на правото никогаш не смее да се замени со владеење на силата. Во многу други конфликти кои беснеат на Блискиот Исток, во Судан, Јемен, Демократска Република Конго и на други места, завојуваните страни мора да запомнат дека дури и војните имаат правила, нагласува високата претставничка на ЕУ.
Калас потенцира дека ниту една земја, голема или мала, не може сама да одговори на денешните предизвици, па затоа колективните решенија се единствениот одржлив пат за справување со сложените глобални предизвици – од мирот и безбедноста, до одржливиот развој и почитувањето на човековите права.
– Обединетите нации се единствен форум за да се обезбеди еднаков глас за сите. Усвојувањето на Пактот за иднината на ОН испрати јасен сигнал: глобалната побарувачка за соработка останува силна. Пактот нуди план за поправеден, инклузивен и ефективен систем. Иницијативата ОН80 е уште еден клучен чекор кон правење на Обединетите нации посилни, поагилни, ефикасни и поодговорни, вели Калас.
Таа посочува дека Европската Унија ги поддржува овие напори и е посветена на осигурување дека ОН се погодни за остварување на овие цели и се способни да испорачаат во интерес на сите.
– Како што се развива геополитичкиот контекст, Европската Унија ќе продолжи да биде кредибилен, доверлив и напреден партнер на Обединетите нации. Во време кога другите се свртуваат кон себе, Европската Унија чекори напред за да води и да гради партнерства и мостови. Нашата посветеност на мултилатерализмот не е само прашање на принцип. Тоа е прашање на глобална неопходност, заклучува Калас во изјавата по повод Меѓународниот ден на мултилатерализмот и дипломатијата за мир, пренесе МИА.
