ВЕСТ НА ДЕНОТ
Семејствата на настраданите во пожарот во Кочани бараат одговорност
Денес во Скопје, во 12 часот и 5 минути, како симболика за задоцнетата реакција на институциите, започна протестот „Марш за ангелите“ – во организација на семејствата на загинатите во трагичниот пожар во дискотеката „Пулс“ во Кочани. Протестот започна пред Oбвинителството, и продолжи кон плоштадот „Македонија“ и заврши пред Собранието.
Од Обвинителството вчера упатија покана до семејствата на настраданите, во текот на денешниот ден да остварат средба со јавниот обвинител и со обвинителите кои постапуваат по предметите. доколку сакаат подетално да се запознаат со сите аспекти од истражната постапка.
Јавниот обвинител на Република Северна Македонија и тимот обвинители кои постапуваат во предметот за пожарот во кочанската дискотека „Пулс“ денеска се сретнаа со семејствата на жртвите и ги информираа за досегашниот тек на истражната постапка.
Откако пред Собраните повикаа на одговорност и отставки од пратениците семејствата на загинатите, имаа средба со пратеници од Левица и СДСМ. Најпрво излегоа пратениците на Левица Борис Крмов и Јована Мојсоска, по што и пратениците од СДСМ, по што имаа разговор и со лидерот на опозицијата Венко Филипче.
Универзитетското студентско собрание на УКИМ го поддржа протестниот марш, а во повикот се придружи и Граѓанската иницијатива „Кој е следен?“.
ИЗЈАВА НА ДЕНОТ
Пратеникот на СДСМ, Фатмир Битиќи вчера во емисијата „24 анализа“ на ТВ 24 предупреди на сериозни проблеми со јавните финансии и економската политика на Владата.
„Реалноста е таа дека ние сме влезени во циклус од 6 до 9 месеци на невраќање на ДДВ и неплаќање на обврски кон стопанството, коешто Владата не го кажува, а што го кажуваат самите стопанствениците“, изјави Битиќи, притоа нагласувајќи дека кога Владата станува најголем должник, било по основ на поврат на ДДВ, било по основ на договорни обврски, тоа е сериозен проблем за економијата затоа што предизвикува неликвидност во стопанството и намалување на активноста.“
„Ако сакаме пред јавноста само да кажеме дека само се случил административен пропуст со доцнењето на исплатите на плати, реалноста е дека еден од инспекторатите, кој е под Министерство за економија, четири месеци нема земено плата.“, изјави Битиќи во врска со доцнењето на исплатата на платите во дел од јавниот сектор.
РЕГИОН
Какви ознаки носеле полицајците кои го спречиjа апсењето на Додик; Српско знаме на шлемот; „The Punisher“ стилизиран череп на опремата
Симболи на Србија и контроверзни симболи на херои од стрипови, заедно со грбовите на полицијата на Република Српска – сето ова можеше да се види на полицајците кои го спречија апсењето на Милорад Додик, претседателот на РС, на 23 април во Источно Сараево.
СВЕТ
Најмалку 8 цивили убиени, 24 повредени во руските напади врз Украина, 12-годишно дете меѓу жртвите
Руските напади низ украинските региони убија најмалку осум цивили и повредија најмалку 24, објавија регионалните власти на 29 април, а меѓу жртвите има и деца. Московските сили ги интензивираа нападите врз украинските градови и населени места, дури и додека Кијив повикува на безусловно примирје.
ПРАШАЊЕ НА ДЕНОТ: Дали семејствата на настраданите во Кочани добиваат доволно поддршка?
Семејствата на загинатите во трагичниот пожар во дискотеката „Пулс“ во Кочани денеска во Скопје организираат „Марш за ангелите“ со почеток во 12 часот и 5 минути пред Oбвинителството , како симболика за, како што велат, задоцнетата реакција на институциите, кој продолжува преу плоштадот „Македонија“ и ќе заврши пред Собранието. Кој е вашиот став?
СЛОБОДНА ЗОНА
„И додека „стабилната и силна“ владина коалиција си ги билда мускулите за настап на наредните избори, во еден многу значаен сегмент од владата, битен за физичкиот опстанок на жителите на оваа држава, предводен од министерот за здравство Арбен Таравари, кој единствено е заинтересиран со кого ќе коалицира на локалните избори, се случува колапс.“, пишува Драган Мишев во колумната „На која планета живеат Мицкоски и министрите?“.
„Како и да е, „нема зима“ за тие што имаат некој тато-бато на функција, па ако ги фатат ќе бидат „примерни граѓани“ ќе си ја платат казната. А ако пројде, пројде, никому ништо. Тешко на тие мнозинство граѓани кои немаат број на телефонскиот именик од некој познат кој би можел да ургира да не им пишуваат казни, како пример со сиротиот таксист кој со жив штит си го бранел такси возило да не му го крене пајакот.“, прочитајте во Блиц коментарот од Дехран Муратов „ Ако пројде, (не) пројде“.
Подготви: Д. Тахири
