Лидерот на едното крило на Алијанса за Албанците, Арбен Таравари, синоќа по состанокот во Тетово објави дека неговата партија ја напушта владината коалиција и ќе дејствува како опозиција. Таравари како причина за ваквата одлука ги наведе разочарувањето од неиспорачаните промени и недовербата меѓу партнерите во власта, особено во контекст на преговорите за локалните избори. Според него, сега партијата подобро ќе функционира надвор од Владата, ќе биде со граѓаните и ќе ги слуша нивните гласови. Таравари тврди дека има огромно незадоволство помеѓу сите граѓани, меѓутоа посебно Албанците за тоа како владее „Влен“ во оваа Влада. Таравари најави дека ќе има уште една средба со премиерот Христијан Мицкоски, меѓутоа премиерот не сака повеќе да се види со него.
„На пример, балансерот се тргна и ние ветивме во ноември или декември дека ќе го донесеме законот за правична застапеност. Сега сме веќе 12, 13 мај никаде не е законот. Можеби ова ќе биде тригер фактор, за балансерот да помине овие денови, да ни покажат дека вие неможевте, ете ние го донесовме, меѓутоа и тоа е придонес и тоа е помош. За жал, мора да констатираме дека во повеќето институции Албанците се жалат дека третманот за тие вработени во администрацијата е полошо отколку порано, што нас, искрено, не загрижува. Исто така многу ни е битен и европскиот пат на Македонија. Јас мислам дека ова ќе биде, тежок период за Македонија многу е битно што поскоро Македонија да биде дел од Европската унија, а ние и како опозиција, впрочем, како и кога бевме во власт се обидувавме во овој правец да фасцилитираме и да помогнеме колку што може, истакна Таравари.
Од Владата за МИА одговорија дека нема да има реконструкција на Владата, туку само смена на министри.
Алијанса за Албанците во Владата има две министерски места – за здравство кое го предводи Таравари и вицепремиерско и министерско место за добро владеење на кое сега е Арбен Фетаи. Во Парламентот, партијата има шестмина пратеници.
Засега се уште не се знае како ќе се одвива смената на министрите, дали и кој од АА ќе поднесе оставка или Владата ќе ги разреши министрите и други функционери од крилото на АА. Исто така е неизвесно колкумина од шестмината пратеници на АА ќе останат со Таравари.
Премиерот Христијан Мицкоски викендов рече дека не му се јасни причините за заминувањето на Таравари, особено што заминува, како што рече, во прегратките на Али Ахмети и ДУИ.
Препукување меѓу Меџити и Таравари
Претседателот на Демократското движење и еден од лидерите во коалицијата ВЛЕН, Изет Меџити, преку објава на социјалната мрежа Фејсбук, напиша дека Таравари не ја напуштил Владата, туку ја предал и го оцени неговото заминување како разочарување за сите Албанци што гласале за промени.
„Ти не донесе промена. Ти не се враќаш кон народот. Ти се враќаш кон црната листа. Ти не ја напушташ Владата. Ти ја предаде Владата“, напиша Меџити на својот фејсбук-профил.
Тој додаде дека коалицијата ВЛЕН продолжува по патот на промените и ги повика сите активисти, симпатизери и гласачи кои се чувствуваат измамени и оставени без насока да им се придружат.
Таравари му одговори на Меџити на Фејсбук дека е смешно да зборува за промени бидејќи е ветеран на ДУИ.
„За ветеран, пензионер на ДУИ кој ја напушти само поради судир на интереси, и кој набрзо беше заслепен од моќта на власта, да се зборува за промени е исто толку апсурдно колку што е и смешно! Да се оди со тебе значи да се парализираш!“, објави Таравари.
Касами најавува мигрирање во власта на пратеници од таборот на Таравари и „Европскиот фронт“
Лидерот на движењето Беса, кое е дел од коалицијата ВЛЕН, Биљал Касами, во интервју за „360 степени“ на МРТ 1 рече дека кога некој ќе излезе од коалицијата се отвора можноста повеќемина други да влезат.
Касами тврди дека наскоро, можеби уште во текот на оваа недела, ќе се зголеми бројот на пратеници кои ќе мигрираат од таборот на Таравари и „Европскиот фронт“ во владејачкото мнозинство.
СДСМ: Таравари ја напушти Владата, сите гледаат дека Мицкоски ја води државата во провалија
Излегувањето на Алијанса за Албанците од Владата е доказ дека полека, но сигурно и граѓаните и политичките партии кои се уште се дел од владината коалиција гледаат дека Мицкоски ја води државата во провалија, велат од опозициската партија СДСМ.
„Таравари вчера соопшти дека органите и телата на Алијанса за Албанците едногласно одлучиле да излезат од Владата и да се вратат заедно со народот. Ова е потврда дека доскорешните партнери на Мицкоски се евакуираат откако во јавноста беа споделени низа на скандали за власта. За прв пат во 35 години независност и плурализам се случува за толку кратко време најголемиот коалиционен партнер да ја напушти Владата, и тоа оваа на Христијан Мицкоски. На крајот, Мицкоски ќе остане осамен и опкружен само со неговите клиентелисти и амбицирани криминалци“, велат од СДСМ.
ВМРО-ДПМНЕ за Таравари: Не може некој да е дел од Владата, а да биде во прегратките на криминалот на СДС и ДУИ
Од ВМРО-ДПМНЕ истакнаа дека Таравари само се интересирал за Груби, Заев и нивните бизниси.
„Вечерва партијата ќе има редовна седница на Извршниот комитет на која што ќе се разговара и за ова прашање. Демантираме дека досега било разговарано за било каква размена на министерства или ресори, или за тоа кој ќе го превземе Министерството за здравство. Тоа не е вистина“, вели Валентин Манасиевски од ВМРО-ДПМНЕ.
Ахмети: Го цениме потегот на Таравари, тој брзо сфати тека оваа влада е антиалбанска
Пред 10 дена лидерот на Демократската унија за интеграција (ДУИ), Али Ахмети истакна дека неговата партија и „Европскиот фронт“ сè уште не донеле одлука како ќе настапуваат на локалните избори кои треба да се одржуваат во октомври годинава.
„Сè уште нема финални разговори. ДУИ сè уште не ги повикала раководните тела на партијата. Во текот на неделава ќе бидат повикани највисоките партиски тела, ќе бидат разгледани сите ситуации. Секако, го цениме смелиот чекор на Таравари, бидејќи тој многу порано сфати дека оваа влада не е ништо повеќе од антиалбанска влада“, нагласи Ахмети.
Лидерот на ДУИ рече дека ја цени одлуката на Таравари да се одвои од „Влен“.
ЦИВИЛ Медиа постави прашање до СДСМ и ДУИ како ја коментираат одлуката на Таравари да ја напушти владата и дали ќе коалицираат со крилото на неговата партија Алијанса на Албанците? До објавување на текстот не добивме одговор.
Не добивме одговор ниту од Владата на Република Северна Македонија за излегувањето на Алијанса на Албанците на Таравари.
Дехран Муратов
