Кога Израел ја започна операцијата „Rising Lion“, официјалните лица во Русија ја опишаа моменталната ескалација на Блискиот Исток како „алармантна“ и „опасна“.
Сепак, како што пишува Би-би-си, руските медиуми брзо ги нагласија потенцијалните позитивни страни за Москва, а меѓу нив се:
• Растот на глобалните цени на нафтата, за кој се предвидува дека ќе ги зголеми руските каси.
• Одвлекувањето на глобалното внимание од војната на Русија против Украина. „Кијив е заборавен“ беше наслов во „Московски комсомолец“.
• И ако понудата на Кремљ да посредува во конфликтот биде прифатена, Русија би можела да се прикаже како клучен играч на Блискиот Исток и како миротворец, и покрај нејзините постапки во Украина.
Сепак, колку подолго трае воената операција на Израел, толку е поголема свеста дека Русија може многу да изгуби од актуелните настани.
„Ескалацијата на конфликтот носи сериозни ризици и потенцијални трошоци за Москва“, напиша рускиот политиколог Андреј Кортунов во деловниот весник „Комерсант“ во понеделник. „Факт е дека Русија не беше во можност да спречи масовен напад од страна на Израел врз земја со која пред пет месеци [Русија] потпиша сеопфатно стратешко партнерство.
„Јасно е дека Москва не е подготвена да оди подалеку од политичките изјави со кои се осудува Израел, не е подготвена да му обезбеди воена помош на Иран.“
Руско-иранскиот договор за стратешко партнерство што Владимир Путин и претседателот Масуд Пезешкијан го потпишаа претходно оваа година не е воен сојуз. Тој не ја обврзува Москва да застане во одбрана на Техеран, иако, во тоа време, Москва го изнесе тоа на виделина.
Во интервју за новинската агенција Риа Новости, министерот за надворешни работи Сергеј Лавров истакна дека договорот посветува „посебно внимание на зајакнувањето на координацијата во интерес на мирот и безбедноста на регионално и глобално ниво, како и на желбата на Москва и Техеран за поблиска соработка во безбедноста и одбраната“.
Во последните шест месеци Москва веќе изгуби еден клучен сојузник на Блискиот Исток, Башар ал-Асад.
Откако сирискиот лидер беше соборен минатиот декември, му беше понуден азил во Русија. Перспективата за промена на режимот во Иран, помислата за губење на уште еден стратешки партнер во регионот, ќе биде од голема загриженост за Москва.
Коментирајќи ги случувањата на Блискиот Исток во вторник, „Московски комсомолец“ заклучи:
„Во глобалната политика во моментов, во реално време се случуваат огромни промени кои ќе влијаат на животот во нашата земја, директно или индиректно“.
Владимир Путин ќе го помине поголемиот дел од оваа недела во Санкт Петербург, каде што градот е домаќин на својот годишен Меѓународен економски форум, настан кој некогаш беше наречен „Руски Давос“, но сега етикетата веќе навистина не важи.
Во последниве години, извршните директори на големите западни компании се држат настрана – особено по целосната инвазија на Русија во Украина.
Сепак, организаторите тврдат дека оваа година ќе присуствуваат претставници од повеќе од 140 земји и територии.
Руските власти речиси сигурно ќе го искористат настанот за да се обидат да покажат дека обидите за изолирање на Русија поради војната во Украина не успеале.
Можеби е економски форум, но геополитиката никогаш не е далеку.
Д. Мишев
ПРОЧИТАЈТЕ И:
