Оваа година, Дубровничкиот форум се одржува под мотото „Канализирање на промената“ (Challenging the Change), 11 и 12 јули. Овој значаен меѓународен форум на кој учествуваат бројни високи претставници од голем број држави во Европа и светот, претставува платформа на која се дискутираат најголемите геополитички прашања и системски предизвици што го обликуваат нашиот свет.
На Дубровничкиот форум се обрати и министерот за надворешни работи Андриј Сибига, кој истакна дека Украина е заинтересирана за завршување на војната и обновување на почитувањето на меѓународното право.
„Ние сме заинтересирани за завршување на војната и обновување на почитувањето на меѓународното право, територијалниот интегритет и суверенитетот на државите. Секоја земја, во кој било дел од светот, има потреба од таков принципиелен пристап“, рече министерот Сибига, меѓу другото.
Тој исто така рече дека инвестициите во одбранбената индустрија на Украина се инвестиции во колективната безбедност.
„Инвестициите во одбранбената индустрија на Украина се инвестиции во колективната безбедност на нашите партнери. Украина, со своето секојдневно борбено искуство и одбранбена индустрија, веќе денес дава придонес во оваа колективна безбедност“, рече шефот на украинската дипломатија.
Украинската амбасадорка Лариса Дир го цитираше министерот Сибига во својата објава на социјалната мрежа Х, почнувајќи ја својата објава на веќе познатиот начин – редниот број на денот од почетокот на целосната руска воена агресија против нејзината земја – ден 1235.
Ден 1235. Во рамки на Дубровник Форум 2025, Министерот за надворешни работи на Украина, г-дин Андриј Сибига, изјави: pic.twitter.com/gvLZ3aeFzj
— Larysa Dir (@dir_larysa) July 12, 2025
Значењето и концептот на Дубровничкиот форум
Во 2023 година, злокобна и за Европа и за остатокот од светот, главната тема на Форумот „Навигација низ глобалното преуредување“ (Navigating the Global Reshuffle) ги истражуваше влијанијата на руската агресија врз Украина и другите насилни конфликти врз постоечкиот глобален систем, како и оправданата загриженост поврзана со еднаквата интеграција на сите држави во глобалното донесување одлуки на поизбалансирана основа.
Една година подоцна, во 2024 година, насловот „Тешки теснеци и безбедни премини“ (Dire Straits and Safe Passages) ги одразуваше очекувањата од серија светски избори и од идната глобална соработка во новиот контекст.
Според концептот објавен на веб страницата на МНР на Хрватска, домаќин на настанот, насловот на овогодишната конференција „Канализирање на промената“ се надоврзува на претходниот дискурс. Таа потврдува дека меѓународната заедница останува во длабока неизвесност и зголемен ризик, дополнително усложнет од тековните војни и други конфликти во Европа, Блискиот Исток, Азија и Африка.
Насловот ги опфаќа и новите почетоци, случувања и можности, поставени во движење и од новите политички лидерства кои ја преземаат власта од двете страни на Атлантикот, како и во други региони.
Затоа, овогодишниот Дубровничкиот форум ги истражува патиштата кон мир, достоинство и обнова во свет потресен од непријателства, превирања и забрзана трансформација. Навлегувајќи во клучното прашање: „Можеме ли да ја канализираме промената – така што 2025 година ќе стане година на надеж?
Ваквите фундаментални дискусии за мирот и човечкото достоинство треба да бидат отворени и плуралистички со разгледување на следното: Човечкиот ум, независен од културите и политичките услови, длабоко во себе знае дека постигнувањето мир и почитувањето на човечкото достоинство понекогаш значи превртување на логиката на светот, дека враќањето на довербата и вистинската промена во односите честопати значи преиспитување на досегашниот пристап, се вели во концептот на Дубровнички форум 2025.
Подготви: Џ. Д.
