МВР попладнево соопшти дека ќе поднесе пријава против пратеникот од СДСМ, Максим Димитриевски, зашто, според истрагата, тој го предизвикал инцидентот што час по полноќ се случил во кафеаната „Палас“ во Куманово.
Според МВР, извесен З. А., гостин во кафеаната, час по полноќ, телефонски пријавил во СВР Куманово, дека неговиот син В. А. е физички нападнат од пратеникот Димитриевски.
„М.Д. од Куманово, во два наврата, му удрил тупаници во пределот на лицето на В. А., при што му нанел видливи повреди. Полициските службеници од СВР Куманово излегле на местото на настанот и констатирале дека оштетениот со своите пријатели бил гостин во ресторанот и на музиката им порачал одредена песна. Кога музиката престанала, тој се упатил кон оркестарот за да праша зошто запреле. Во тој момент, му се приближило лицето М. Д. Тој, исто така, бил на семејна прослава, и во присуство на повеќе гости, го удрил во пределот на лицето два пати, со што му нанел телесни повреди“, стои меѓу другото, во соопштението на МВР.
Сведоци кои биле присутни за време на настанот, го потврдиле случајот, информираат од МВР.
Пратеникот Димитриевски изутринава за ЦИВИЛ Медиа презентираше поинаква верзија. Тој изјави дека всушност, повеќе лица под дејство на алкохол, првин вербално, а потоа и физички го нападнале во кафеаната „Палас“, во време кога со свои пријатели, тој и сопругата го славеле нејзиниот роденден. Притоа, тој се здобил со полесни повреди на едната рака.
„На семејна прослава да бидеш принуден да се браниш од алкохолизирани лица, тоа е навистина многу ниско. Бев нападнат од група видно алкохолизирани лица. Луѓето не ги познавам, сите беа во цивил. Некои потоа рекоа дека дел од нив биле и полицајци, но сепак тоа треба да го утврди полицијата“, изјави Димитриевски за ЦИВИЛ Медиа.
Од МВР не одговорија дали во инцидентот учествувале и лица кои се вработени во МВР.
Димитриевски е истакнат член на СДСМ. Пред да стапи на пратеничката функција, тој ја извршуваше функцијата претседател на Советот на Општина Куманово. Тој е еден од жестоките борци против криминалот, корупцијата и за враќање на демократските процеси и вредности во Македонија.
