Во Србија се случија насилни судири за време на протестите против претседателот Александар Вучиќ. Судири избувнаа во бројни поголеми и помали градови меѓу демонстрантите, полицијата и поддржувачите на Вучиќ, објавија српски регионални медиуми.
Во среда вечерта во Србија избувнаа насилни судири за време на протестите против владата на претседателот Александар Вучиќ. Во бројни градови, поголеми и помали, демонстрантите се судрија со полицијата и поддржувачите на Вучиќ.
Ескалацијата на протестите, кои траат девет месеци, дојде откако поддржувачите на СНС физички ги нападнаа демонстрантите во Војводина, Врбас и Бачка Паланка во вторник, а полицијата не реагираше.
Како одговор, во среда беа организирани протести на 30 места, со маршеви насочени кон седиштето на СНС. Таму, демонстрантите беа пречекани од полициски кордони и поддржувачи на партијата, пишува ДВ.
Повеќето инциденти се случија во Нови Сад, но и во Белград. Помирно беше во Ниш, Панчево, Крушевац, Чачак, Крагуевац, Смедерево, Ужице, Лазаревац. И на многу други места.
Во Белград и Нови Сад, поддржувачите на Српската напредна партија испукаа пиротехнички средства кон демонстрантите, кои потоа делумно возвратија. Во Нови Сад, полицијата употреби солзавец, а во текот на ноќта беа запалени и просториите на СНС.
Во Белград, полицијата во полна опрема ги спречи демонстрантите да се приближат до зона во парк во близина на зградата на парламентот каде што поддржувачите на Вучиќ кампуваат од март.
На други места во Белград, демонстрантите се судрија со полицијата, која им спречи пристап до локалните простории на СНС.
На прес-конференција доцна во среда, Вучиќ рече дека 16 полицајци и 64 поддржувачи на СНС се повредени само во Нови Сад. Вучиќ ги опиша демонстрантите како „бандити и убијци“ и рече дека Белград и Нови Сад сега ќе бидат „исчистени“ од нив.
Тој изјави дека потегот имал за цел да спречи „граѓанска војна“ и им се заблагодари на своите поддржувачи, „прекрасни обични луѓе“ кои, како што рече, го заштитиле седиштето на партијата „од лудите блокадери“.
Тој, исто така, ги обвини неидентификувани странски сили за организирање на немирите и вети апсења. „Лицата кои го прекршиле законот ќе бидат уапсени… Вечерва спречивме катастрофално сценарио планирано од некој од странство“, рече Вучиќ.
Опозициското движење „Крени-Промени“ соопшти дека поддржувачите на Вучиќ се одговорни за судирите. „Нападите врз луѓе со пиротехнички средства го нарушуваат нивното право на живот и протест“, се вели во соопштението.
Протестите, кои траат повеќе од девет месеци, избувнаа по уривањето на новореновираниот покрив над пероните на железничката станица во Нови Сад на 1 ноември 2024 година, во кој загинаа 16 лица.
Д. Т.
