Европската Унија останува поделена околу тоа како да реагира на катастрофалната хуманитарна ситуација во Појасот Газа и какви мерки да преземе против Израел, утврдено е на денешниот состанок на министрите за надворешни работи на ЕУ во Копенхаген.
Европската комисија предложи суспендирање на финансирањето за истражувања на израелските компании откако внатрешна ревизија на ЕУ заклучи дека акциите на Израел во разурнатата територија го прекршуваат договорот меѓу ЕУ и Израел, кој ги обврзува двете страни да ги почитуваат човековите права.
Германија е меѓу земјите што го блокираат напредокот на мерката, јави ДПА. Германскиот министер за надворешни работи, Јохан Вадефул, нагласи дека Берлин засега не е подготвен да го поддржи предлогот за санкции.
Планираната мерка веројатно нема да има никакво влијание врз политичкото одлучување и воените дејствија на Израел во Појасот Газа, рече Вадефул. Затоа Германија не е убедена во предлогот, рече тој.
Министерот нагласи дека Германија наместо тоа, ги ограничува испораките на оружје за Израел.
„Верувам дека ова е многу насочена мерка која е многу важна и многу неопходна“, рече тој.
Шефицата на дипломатијата на ЕУ, Каја Калас, рече дека „не е многу оптимистка“ дека ќе има консензус за тоа како да се реагира на војната во Газа, бидејќи „прилично попустливиот“ предлог што таа го дала за суспендирање на финансирањето за истражување не успеал да го добие потребното мнозинство.
Плановите би требало да бидат одобрени со т.н. квалификувано мнозинство, што значи од најмалку 15 од 27-те земји-членки на ЕУ кои претставуваат најмалку 65 проценти од населението на блокот. Ова ѝ дава големо влијание на Германија, која е најголема земја во ЕУ со население од 83,5 милиони.
– Кога сме поделени, немаме обединет глас. Ако немате обединет глас, тогаш на оваа тема немаме глас на глобалната сцена, додаде таа.
Додека некои земји на ЕУ, како Германија и Австрија, остануваат претпазливи околу поддржувањето на санкциите, неколку други земји, вклучувајќи ги Данска, Шпанија и Ирска, се залагаат за построг став.
– Сега мораме да ги претвориме зборовите во дела, рече данскиот министер за надворешни работи, Ларс Расмусен, кој е домаќин на состанокот.
– Го сметаме Израел за пријател, а израелскиот народ за пријател. Но, имаме проблем со актуелната влада, додаде тој.
Данска е подготвена да ја ограничи трговијата со Израел, да воведе забрана за производи од израелските населби на Западниот Брег или да воведе санкции за израелските министри, рече Расмусен.
Тој сепак призна дека постигнувањето консензус за овие мерки „веројатно не е остварливо“, додавајќи дека проблемот на ЕУ е што „бавниот брод во конвојот ја одредува брзината“, пренесе МИА.
