Шефицата на Европската унија (ЕУ) за надворешна политика, Каја Калас, изјави во саботата дека не е „можно да се замисли“ замрзнатата руска имотна да ѝ биде вратена на Русија без таа претходно да плати репарации, поради нејзината инвазија врз Украина.
Калас ова го изјави, како што пренесува „Ројтерс“, во Копенхаген, во пресрет на состанокот на министрите за надворешни работи на земјите-членки на ЕУ, пренесе Радио Слободна Европа.
„Не можеме ниту да замислиме дека… ако… дојде до прекин на огнот или мировен договор, тој имот ќе ѝ биде вратен на Русија доколку не плати репарации“, изјави Калас.
ЕУ тврди дека има замрзнато руски имот во вредност од околу 210 милијарди евра, во рамки на санкциите воведени кон Москва поради инвазијата врз Украина.
Два дена претходно, претседателката на Европската комисија, Урсула фон дер Лајен, најави дека ЕУ наскоро ќе усвои нов (деветнаесетти) пакет санкции против Русија откако почна инвазијата врз Украина во февруари 2022 година.
„Паралелно со тоа, работиме на користење на замрзнатата руска имотна за помош во одбраната и обновата на Украина. Се разбира, даваме силна и недвосмислена поддршка на Украина – нашиот сосед, партнер, пријател и идна членка“, рече Фон дер Лајен на 28 август.
Таа ова го изјави откако Русија на 28 август изведе ракетни и дрон напади врз Киев – најмасовните во тој град во последните неколку недели.
Во тие напади загинаа најмалку 19 лица, а десетици беа ранети.
Нападите беа осудени од европските лидери, а Велика Британија и ЕУ ги повикаа руските дипломати на разговори за да изразат протест, пишува РСЕ.
